Kryekuvendari Konjufca kërkon zbardhjen e rastit të djegies së veturës të nënkryetarit Simiq

Është djegur mbrëmë pas mesnatës, në Leposaviq, vetura e nënkryetarit të Kuvendit, Slavko Simiq. Askush nuk është lënduar, por aktin e ka dënuar, përveç kryeparlamentarit Konjufca, edhe partia e tij Lista Serbe, si dhe drejtori i Zyrës për Kosovën në Qeverinë e Serbisë, Marko Gjuriq.

Këto janë pamjet e djegies së veturës së nënkryetarit të Kuvendit, Slavko Simiq.

Incidenti ka ndodhur të mërkurën pas mesnate, kur në drejtim të veturës së parkuar të Simiqit është gjuajtur eksploziv, në rrugën “Milan Raduloviq”, në Leposaviq, raporton KTV.

Askush nuk është lënduar, por shpërthimi i ka tronditur banorët në afërsi.

Rastin e ka konfirmuar zëdhënësi i Policisë për rajonin e veriut, Branislav Radoviq.

“Vetura ka qenë e parkuar në garazhin përballë ndërtesës ku jeton pronari i veturës. Në vendin e ngjarjes kanë dalë ekipet e zjarrfikësve dhe një patrullë e policisë e stacionit në Leposaviq. Zjarrfikësit e kanë lokalizuar zjarrin në veturë, por ajo prapë është djegur e tëra. Këqyrja e vendit të ngjarjes ka ndodhur në orën 02:15, dhe më pas është kontaktuar prokurori kujdestar. Rasti është hapur në stacionin policor në Leposaviq dhe hetimi është duke vazhduar”, ka thënë Radoviq për TV Most.

Aktin e ka dënuar kryetari i Kuvendit të Kosovës, Glauk Konjufca.

“Inkurajoj organet e rendit dhe të drejtësisë që të ndërmarrin të gjitha veprimet e nevojshme për të zbardhur sa më shpejt rastin dhe për të vënë para përgjegjësisë ligjore autorët e tij”, thuhet në reagimin e kryetarit Konjufca.

Edhe Lista Serbe, pjesë e së cilës është Simiqi, e ka dënuar rastin, duke thënë se ky ishte një sulm për të gjithë serbët e lirë që po luftojnë për mbetjen e popullit serb në Kosovë.

“Pa marrë parasysh presionet me të cilat po përballen pjesëtarët dhe funksionarët e Listës Serbe, ky sulm qyqar ndaj familjes Simiq, vetëm do të na forcojë në mbrojtjen e interesave të popullit serb për paqe dhe mbetje në Kosovën e Metohinë tonë”, thuhet në një njoftim.

Nga Beogradi ka reaguar edhe drejtori i Zyrës për Kosovën në qeverinë e atjeshme, Marko Gjuriq.

Ai i ka ftuar organet e rendit që ta hetojnë sulmin ndaj, siç ka thënë ai, njërit prej politikanëve më të mirë dhe më me ndikim në Kosovë.