GAP: Institucionet, më 2018, shpenzuan rreth 14.7 milionë euro

14.7 milionë euro janë shpenzuar për udhëtime zyrtare brenda dhe jashtë vendit nga institucionet publike, gjatë vitit 2018.

Vetëm për mëditje janë shpenzuar 3.1 milionë euro më shumë sesa në vitin 2017, e që është shifra më e lartë që nga viti 2014, raporton KTV.

Të dhënat janë publikuar nga Instituti GAP, në hulumtimin e tij për këtë kategori shpenzimesh, e të dhënat janë siguruar pas kërkesave për qasje në dokumente zyrtare drejtuar institucioneve.

“Brenda këtij raporti ka raste kur një shërbyes civil ka përfituar me mëditje dyfishin e pagës së tij që e arrin për një vit. Ndërsa, ka edhe persona që nuk janë fare shërbyes civilë, por që kanë përfituar mëditje nga buxheti i shtetit, pa pasur kontratë me institucionet gjegjëse”, ka thënë Blendi Hasaj, hulumtues në GAP.

Ky institut ka ngritur si shqetësim çështjen e Udhëzimit Administrativ përmes së cilit rregullohet çështja e mëditjeve, e që është nxjerrë në vitin 2004, nga UNMIK-u.

Zyrtarë nga Auditori i Përgjithshëm, kanë treguar se vitin e kaluar ia kanë dërguar një letër Qeverisë, përmes së cilës i kanë kërkuar rishikimin e Kornizës ligjore për rregullimin e mëditjeve.

Aty u tha se ekziston një vendim i Qeverisë i vitit 2008, që i obligon institucionet që ngjarjet që mbulohen me paratë e buxhetit të shtetit të organizohen brenda vendit, por që i njëjti nuk është zbatuar.