OJQ-të kritikojnë qasjen e institucioneve publike ndaj sinjalizuesve kundër korrupsionit

09 December 2019 19:21

Me aktivitete të shumta e diskutime ka nisur Java Kundër Korrupsionit.

Në Ditën Ndërkombëtare kundër korrupsionit, debati i parë është mbajtur nga organizata “FOL”, e që kishte për temë mbrojtjen e sinjalizuesve.

Në këtë diskutim u tha se Ligji për Sinjalizuesit është mjaft i avancuar, por mbetet sfidë ruajtja e konfidencialitetit të personave që raportojnë shkeljet e ndryshme brenda institucioneve publike, raporton KTV.

Lëvizja “FOL” ka prezantuar një raport, sipas të cilit nga 160 institucione të ndryshme, ka pasur shumë të tilla që as nuk kanë pasur informata për Ligjin për Sinjalizuesit, por edhe se duhet të kenë zyrtarin përgjegjës që merret me ta brenda institucionit.

Në këtë tryezë u rekomandua që të motivohen sinjalizuesit përmes formave të ndryshme të shpërblimit.

Kurse, në kuadër të Javës Kundër Korrupsionit, koalicioni i organizatave të shoqërisë civile, mbështetur nga Ambasada Amerikane në Prishtinë, organizon debate, diskutime e ngjarje të ndryshme për këtë temë.

© KOHA. Të gjitha të drejtat janë të rezervuara.

Të ngjashme