Çka foli sot në konferencë Ramush Haradinaj

08 December 2019 19:06

Kryeministri në detyrë, Ramush Haradinaj, ka thënë se deklarimet e zyrtarëve serbë lidhur me masakrën e Reçakut janë kthim mbrapa.

Në një konferencë për media, Haradinaj ka bërë thirrje që qytetarët e Kosovës të mos përfshihen në diskutime të tilla, sepse në të kundërtën, do të përballen me ligjin, raporton KTV.

Derisa ka komentuar deklaratat e kryetarit të Vetëvendosjes, Albin Kurti, për mundësinë e zgjedhjeve të reja, Haradinaj ka thënë se mosformimi i institucioneve të Kosovës, do të ishte pazotësi e mandatarit të zgjedhur nga populli.

Kryetari i AAK-së nuk ka bërë të ditur nëse deputetët e tij do të përkrahin formimin e Qeverisë së re, në krye Albin Kurtin, duke thënë se do të shqyrtojë rolin e tyre në procese të caktuara.

Mes tjerash, Kreu i ekzekutivit e ka quajtur skenar të bërë me qëllim, mundësinë që Kushtetuesja të caktojë masë të përkohshme ndaj Ligjit për Pagat.

Para gazetarëve, Haradinaj ka shpalosur detaje sa u përket personave të zhvendosur nga Shqipëria. Sipas tij, në Kosovë janë rreth 1300 persona të zhvendosur e të cilët në mënyrë vullnetare janë duke u kthyer në Shqipëri.

© KOHA. Të gjitha të drejtat janë të rezervuara.

Të ngjashme