Kosova refuzon pjesëmarrjen në ndarjen e “Nobelit” për Handken, kërkon që njëjtë të veprojë edhe Shqipëria

07 December 2019 19:11

Nuk u ka shpëtuar pyetjeve për gjenocidin serb. Ditën kur i mbushi 77 vjet, shkrimtari Peter Handke u pyet nga gazetari amerikan Peter Mass për masakrën në Srebrenicë, pyetje të cilën Handke e konsideroi injorante, pasi e tregoi një histori se si kishte marrë një letër të shkruar në një copë letre tualeti, për të cilën tha se e preferon më shumë se pyetjen e gazetarit Mass.

Megjithatë, qëndrimet e tij si mohues i gjenocidit dhe krimeve serbe në Ballkan, Handke nuk i ka fshehur dhe kjo është ajo që përbën problem, sipas Durim Abdullahut, historian dhe njohës i letërsisë, raporton KTV.

Sipas tij, Akademia Suedeze, duke e radhitur Handken në mesin e fituesve të saj, komprometon veten moralisht.

Derisa profesori i Gjuhës Shqipe, Bardh Rugova, konsideron se efektet e këtij vendimi, Akademia Suedeze do ti ndjejë edhe në të ardhmen.

Ceremonia e ndarjes së çmimit Nobel për Letërsi, do të mbahet të martën në Stokholm.

Të njëjtën do ta bojkotojë ambasadorja e Kosovës në Suedi, Shkendije-Geci-Sherifi. E një vendim të tillë e ka komunikuar Ministri Behgjet Pacolli, me thirrjet që ngjashëm të veprojë edhe ambasadori i Shqipërisë në këtë shtet.

Edhe Peter Englund, dikur sekretar i përhershëm i Akademisë Suedeze dhe anëtar i saj, ka bërë të ditur se nuk do të marrë pjesë në ceremoninë e së martës.

“Të kremtoj çmimin Nobel për Peter Handken, do të ishte hipokrizi e madhe nga ana ime”, citohet t’u ketë thënë mediave suedeze Englund.

© KOHA. Të gjitha të drejtat janë të rezervuara.

Të ngjashme