Todosijeviq dënohet në Kosovë për nxitje të urrejtjes, përkrahet nga Serbia

“Shkak për agresionin në vendin tonë ka qenë e ashtuquajtura katastrofë humanitare në Kosovë e Metohi, Reçaku i trilluar, dhe ishin pikërisht ata, shqiptarët terroristë, të cilët e kanë trilluar gjithë këtë, kanë kryer krimet më të rënda në Kosovë e Metohi, për të cilat deri në ditën e sotme, askush nuk është përgjigjur. Kanë kryer krime para agresionit të NATO-s, vranë serbë të mirë shtëpiakë dhe policë në vendet e tyre të punës. Fushatën e tyre të përgjakshme e vazhduan edhe gjatë agresionit dhe pas të ashtuquajturit misionit paqësor në Kosovë e Metohi”, kishte thënë Ivan Todosijeviq, sa ishte Ministër i Administrimit të Pushtetit Lokal në Kosovë.

E kjo deklaratë ka bërë që këtë të enjte, ish-ministri i Administratës dhe Pushtetit Lokal, Ivan Todosijeviq, të dënohet me dy vjet burgim.

Me akuzat për “nxitje të urrejtjes, përçarjes ose mosdurimit kombëtar, racor, fetar apo etnik”, Todosijeviqi është shpallur fajtor nga Gjykata Themelore në Prishtinë.

E derisa vetë Todosijeviqi nuk ishte për të dëgjuar aktgjykimin, kryetari i trupit gjykues ka bërë të ditur se ekzekutimi i dënimit me burg do të bëhet pasi aktgjykimi të bëhet i plotfuqishëm.

I menjëhershëm ka qenë reagimi i zyrtarëve në Beograd për këtë dënim.

Edhe presidenti i Serbisë, Aleksandar Vuçiq, i është referuar masakrës së Reçakut si trillim i bërë nga William Walker.

“Është e tmerrshme. Ivan Todosijeviq një serb i ndershëm nga Zveçani u dënua me 2 vjet burgim sepse atë çfarë ndodhi në Reçak e quajti krim të fabrikuar. Dhe, ja e them edhe unë – ajo në Reçak ishte krimi i fabrikuar, që të gjitha i inskenoi ai idioti e mashtruesi global, Walker, nuk di a ka ndonjë emërtim tjetër për të. E përsëris çdo ditë këtë për të parë nëse do të na dënojnë e nëse do të bëjnë diçka tjetër vetëm pse nuk u pëlqen e vërteta”, ka thënë Vuçiq.

E për këtë dënim ka reaguar edhe kryetari Listës Serbe, Goran Rakiq, i cili ka thënë se nëse edhe Gjykata e Apelit e vërteton këtë dënim, atëherë ai do të kërkojë që të gjithë serbët të cilët punojnë nëpër institucione, t’i lëshojnë vendet e tyre të punës.

Ivan Todosijeviq, që tani është deputet i Kuvendit të Kosovës, vitin e kaluar, pas deklaratës për masakrën e Reçakut, u shkarkua nga pozita e ministrit, nga kryeministri Ramush Haradinaj.