Certifikimi i rezultateve të zgjedhjeve të 6 tetorit është shtyrë edhe për disa ditë.
Kjo pasi në Gjykatën Supreme, Lëvizja Vetëvendosje ka dorëzuar ankesë lidhur me vendimin e Panelit Zgjedhor për Ankesa dhe Parashtresa, për të mos urdhëruar KQZ-në për numërimin edhe të 392 pakove të ardhura me vonesë nga diaspora, raporton KTV.
Zëdhënësi i KQZ-së, Valmir Elezi, ka thënë se publikimin e rezultateve pas rinumërimit të mbi 1400 pakove, mund ta bëjnë vetëm nëse PZAP e Supremja nuk ka ndonjë çështje në shqyrtim.
Në anën tjetër, nga PZAP-ja kanë konfirmuar se kanë përfunduar me shqyrtimin e të gjitha ankesave.
Mulë Desku nga ky institucion, ka shtuar se janë të obliguar që ta zbatojnë çfarëdo vendimi të Gjykatës Supreme.
Vetëvendosje pret që Supremja të vendosë njësoj sikur në rastet e mëparshme, kur urdhëroi numërim të pakove që erdhën me vonesë nga diaspora.
Pranimin e ankesës nga Vetëvendosje, përmes një e-maili e kanë konfirmuar edhe nga Gjykata Supreme.
“E njëjta do të shqyrtohet dhe vendoset brenda afatit ligjor prej 72 orësh nga koha e deponimit në Gjykatën Supreme”, thuhet në përgjigjen e Supremes.
Publikimi i rezultateve nga përfundimi i rinumërimit të mbi 1.400 pakove do t’i hapte rrugë certifikimit të rezultateve nga Komisioni Qendror Zgjedhor.
E rrjedhimisht, finalizimit të marrëveshjes bashkëqeverisëse nga dy partitë që morën shumicën e votave në zgjedhjet e mbajtura rreth 2 muaj më parë, Lëvizja Vetëvendosje dhe Lidhja Demokratike e Kosovës.
© KOHA. Të gjitha të drejtat janë të rezervuara.
