Presidenti amerikan, Donald Trump, ka paguar më shumë se 6 mijë reklama në Facebook kundër procedurave hetimore që mund të shpien deri te shkarkimi i tij.
Sipas të dhënave në gjigantin social, ekipi i fushatës së presidentit, këto reklama i ka realizuar vetëm në javën e parë të dëshmive rreth telefonatës së famshme me presidentin e Ukrainës, Volodymyr Zelensky.
Reklamat që kanë kushtuar hiç më pak se 1 milion dollarë, tregojnë për rolin e veçantë që rrjetet sociale po e luajnë në politikën e sensacioneve të SHBA-së.
Që prej 11 nëntorit e deri të dielën e javës së shkuar, vlerësohet se në Facebook kanë qarkulluar 6 mijë e 286 reklama kundër procesit të shkarkimit të Trumpit, transmeton KTV raportin e Reutersit. Shumë prej këtyre reklamave kishin titullin “mashtrimi me procesin e shkarkimit”.
E në javën e dytë të seancave dëgjimore, ekipi i Trumpit filloi me reklamat, përmes të cilave kërkonte donacione kundër procesit hetimor që mund të çojnë te shkarkimi.
Shumica e këtyre reklamave përmbanin fotografi të kryetares së Dhomës së Përfaqësuesve, Nancy Pelosi dhe kryetarit të Komitetit të Inteligjencës, Adam Schiff, të dy demokratë nga Kalifornia.
Presidenti amerikan mbetet njëri prej shpenzuesve më të mëdhenj në reklamat e Facebookut. Të dhënat tregojnë se nga muaji janar deri në nëntor, ai shpenzoi 15 milionë dollarë në artikuj të sponsorizuar.
Shpenzuesi më i madh nga ana e demokratëve është kandidati në garën për nominim presidencial, Tom Steyer. Që prej muajit janar, ai ka shpenzuar 12 milionë dollarë në reklamat e Facebookut, ndërsa vetëm në fillim të muajit nëntor, ekipi i fushatës së tij, shpenzoi 164 mijë dollarë në reklamat për procesin e shkarkimit të Trumpit.
Kandidatët e tjerë për nominim presidencial nga ana e demokratëve, Elizabeth Warren dhe Bernie Sanders, kanë shpenzuar mbi 4 milionë dollarë për reklamat në Facebook.
Ndërkohë, sa i përket aferës me telefonimin e presidentit të Ukrainës, ka reaguar edhe ish-sekretari Rex Tillerson.
Ai kritikoi ish-shefin e tij, Donald Trump, duke thënë se telefonata, padyshim se është realizuar për favore personale, por sipas tij, ka qenë veprim i gabuar i presidentit amerikan.
© KOHA
