Video

Gëzohet Nisma, PZAP-ja anulon votat nga Serbia dhe çon në rinumërimin 1472 vendvotimeve

Votat nga më shumë se 3 mijë e 700 pako me fletëvotime të ardhura nga Serbia, do të largohen nga rezultati përfundimtar i zgjedhjeve të 6 tetorit.

Vendimin e ka marrë Paneli Zgjedhor për Ankesa dhe Parashtresa, duke i shpallur këto votat në këto pako të pavlefshme, kërkesë kjo e koalicionit Nisma-AKR-PD, raporton KTV.

Në bazë të arsyetimit të PZAP-së, kontestuese rreth votave të ardhura nga Serbia, është mënyra se si janë dorëzuar dhe pranuar pakot.

“Mënyra si janë grumbulluar pakot me fletëvotime, mënyra e dorëzimit të tyre direkt në fahun postar të KQZ-së, nga persona të paautorizuar, më shumë i ngjason votimit kolektiv, i cili cenon dhe minon rëndë integritetin e procesit zgjedhor”, thuhet ndër të tjera në vendimin e PZAP-së.

Ndaj aprovimit të kërkesës, ka reaguar Nisma Socialdemokrate.

Në një konferencë për media, kryetari Fatmir Limaj, ka thurur lavde për punën e PZAP-së, derisa nuk ka kursyer kritikat për Komisionin Qendror të Zgjedhjeve.

Megjithatë, për ta zbatuar vendimin e PZAP-së, Komisioni Qendror Zgjedhor duhet të presë edhe disa orë, për të parë nëse ka ankesa në Gjykatën Supreme.

E, i gjithë procesi pritet të zgjasë së paku deri në fund të nëntorit.

Paneli Zgjedhor për Ankesa dhe Parashtresa, ka urdhëruar Komisionin Qendror Zgjedhor t’i rinumërojë edhe 1 mijë e 472 vendvotime.

Nga 102 ankesa, sa ka pranuar gjithsej, PZAP-aj ka aprovuar 53 prej tyre, prej të cilave 52 lidhen me rinumërimin e vendvotimeve. Të pabazuara janë shpallur 25 ankesa, 23 si të palejuara, kurse një ankesë është tërhequr.

Ndaj vendimeve të PZAP-së, palët kanë të drejtë 24 orë për t’u ankuar në Gjykatën Supreme.