Drejtoria e MPJ-së kërkon që të dërguarit e Pacollit në ambasada të mos pranohen

09 November 2019 19:17

Vendimet e shumta të ministrit të Jashtëm, Behgjet Pacolli, për emërime e delegime në misione diplomatike, kanë marrë një goditje nga Drejtoria e Përgjithshme e kësaj ministrie.

Koha Ditore, këtë të shtunë, ka raportuar se drejtoria e udhëhequr nga ambasadori Albert Prenkaj, u ka shkruar ambasadorëve kosovarë që të mos akreditojnë personat që nuk mbajnë gradë diplomatike, raporton KTV.

“Ju informoj se asnjëri nga personat që janë dërguar në misionet që i udhëhiqni nuk është pjesëtar i shërbimit civil, i shërbimit diplomatik dhe as i Ministrisë së Punëve të Jashtme dhe, si i tillë, nuk është subjekt i trajtimit të kornizës ligjore të Republikës së Kosovës dhe as konventave ndërkombëtare për marrëdhëniet diplomatike dhe konsullore...”, thotë Drejtoria e Përgjithshme, MPJ.

Shkresa, e siguruar nga gazeta, thekson edhe shqetësimin për akreditimet në misione diplomatike, është përcjellë me qëllim të mbarëvajtjes së politikës së jashtme të Kosovës dhe ruajtjes së imazhit shtetëror.

Shkresa, tutje, konteston edhe bazën ligjore të vendimeve të Pacollit, duke iu referuar mungesës së avancimit në grada përmes formave që i parasheh ligji, çka edhe e pamundëson që të njëjtit të akreditohen si diplomatë të Kosovës në vende pritëse.

Megjithatë, Behgjet Pacolli, ministër në largim i Punëve të Jashtme, ka mohuar të ketë diçka të jashtëligjshme në vendimet e tij për emërim e delegime nëpër misione diplomatike jashtë vendit.

“Gjatë mandatit tim nuk është vepruar asgjë jashtë ligjit dhe nuk ka të tillë pa grada diplomatike”, ka thënë Behgjet Pacolli, Ministër në largim i Punëve të Jashtme.

Koha Ditore e KTV-ja, kanë raportuar në vazhdimësi për vendime të ministrit Pacolli, me anë të të cilave ka rehatuar kryesisht anëtarë të partisë së tij në misione diplomatike.

Së voni ka reaguar edhe Shoqata Sindikale e Shërbimit të Jashtëm, duke alarmuar për numrin e vendimeve e avancimeve që janë bërë në kundërshtim me ligjet në fuqi.

© KOHA. Të gjitha të drejtat janë të rezervuara.

Të ngjashme