PDK-ja e LDK-ja kundër numërimit të votave të mbetura të diasporës

31 October 2019 19:13

Shumë polemika e thumbime kanë mbretëruar në mbledhjen e së enjtes në Komisionin Qendror të Zgjedhjeve, kur është diskutuar për vendimin e Gjykatës Supreme për numërimin e votave të ardhura nga diaspora pas datës 6 tetor.

Kryetarja e KQZ-së, Valdete Daka, ka thënë se institucioni që udhëheq, do ta zbatojë vendimin e Supremes, raporton KTV.

Ajo ka thënë se nuk e komenton vendimin e Supremes pasi "e kanë obligim ta zbatojnë atë".

Ilir Gashi nga PDK-ja, ka thënë se është krijuar një precedent dhe është shkelur Ligji për zgjedhjet, por sipas tij, është shqetësuese se çka do të bëjë KQZ-ja me 1,750 pakot e ardhura më 17 tetor, duke theksuar se ndoshta ka ende pako që po vijnë.

Edhe Sami Hamiti i LDK-së është pajtuar me Gashin duke thënë se është bastarduar procesi me pakot e diasporës dhe ato të ardhura nga Serbia.

Ai ka pyetur nëse dikush është në dijeni se mos ka mbetur edhe ndonjë pako në Merdare.

Adnan Rrustemi i VV-së, ka thënë se aktgjykimi flet për principin e pranueshmërisë së pakove të votimit.

Vamir Elezi, zëdhënës i KQZ-së, ka qartësuar se proceduralisht numërimi i këtyre fletëvotimeve nuk mund të fillojë gjatë ditës së sotme, por pas dy ditësh.

Me unanimitet, KQZ-ja ka vendosur për plotësim të vendimit 195/2019 mbi caktimin e lartësisë së mjeteve nga Fondi për mbështetjen e subjekteve politike për vitin 2019, i cili mundëson transferimin e fondeve nga Fondi për mbështetjen e subjekteve politike, për financimin e aktiviteteve të rregullta të tyre deri në certifikim të zgjedhjeve.

Supremja, një ditë më parë ka hedhur poshtë vendimin e PZAP-së për mosnumërim të votave të mbetura të diasporës.

© KOHA. Të gjitha të drejtat janë të rezervuara.

Të ngjashme