Video

250 punëtorë të pakënaqur me shefin e Facebookut

Qindra punëtorë të Facebookut kanë shkruar një letër protestuese ndaj vendimit të kompanisë që të lejonte politikanët të bënin deklarime të rrejshme në formë të reklamave në rrjetin social.

Në letrën e nënshkruar nga 250 punëtorë të Facebookut, thuhej se vendimi kërcënon qëndrimet e rrjetit social për një platformë sa më të pastër dhe pa lajme të rrejshme.

“E kundërshtojmë ashpër rregullën aktuale. Nuk mbron zërin e njerëzve, por ua mundëson politikanëve që platformën tonë ta përdorin si armë ndaj njerëzve që mendojnë se përmbajtja e postuar nga politikanët, është e besueshme”, thuhet në letrën e 250 punëtorëve, transmeton KTV.

Letra që ka shkuar në adresën e Mark Zuckerbergut dhe shefave tjerë të Facebookut, është postuar dy javë më parë në një rrjet të brendshëm të komunikimeve në gjigantin teknologjik.

Ky është rasti i parë dhe më seriozi që punëtorët nisin kundër shefave të tyre në Facebook.

“Këto çështje duam t’i diskutojmë hapur, sepse dëshirojmë që të shohim ndryshime”, thuhej më tej në letër.

Letra kërcënuese është bërë në periudhën kur është shtuar pakënaqësia për industrinë e teknologjisë, të cilën në distancë e kanë vëzhguar punëtorët e Facebook-ut.

Punëtorët e kompanive tjera, si Google, Amazon dhe Microsoft, kanë organizuar protesta të ndryshme kundër kontratave me ushtrinë dhe ngacmimeve seksuale brenda kompanive.

Aktivistët që kanë punuar me punëtorët e Facebook-ut, kanë thënë se ata janë shumë të frikësuar të flasin në media.

Në vitet e para të funksionimit, rrjeti social, që njihet për një proces të ndërlikuar të punësimit, rrallë ka lejuar që problemet e brendshme të dalin në media. Por, në vitet e fundit kjo gjë ka ndryshuar.