Video

Supremja e urdhëron KQZ-në që ta bëjë numërimin e votave të mbetura të diasporës

4 mijë e 639 votat e ardhura me vonesë nga diaspora do të numërohen.

Kjo pas vendimit të fundit të Gjykatës Supreme, lidhur me ankesën e Lëvizjes Vetëvendosje ndaj Panelit Zgjedhor për Ankesa dhe Parashtresa, i cili ditë më parë kishte hedhur poshtë kërkesën e VV-së për numërim.

Në vendimin e Gjykatës Supreme thuhet se votuesit nuk kanë faj për arritjen me vonesë të fletëvotimeve.

“Përkundrazi, mosnumërimi i këtyre fletëvotimeve, me bazë ligjore dhe kushtetuese, e bën të kontestueshëm gjithë procesin e numërimit të fletëvotimeve në këto zgjedhje parlamentare”, thuhet në vendim, raporton KTV.

Sipas vendimit të Gjykatës Supreme, Komisioni Qendror Zgjedhor është i detyruar ta bëjë rinumërimin e fletëvotimeve nga diaspora.

“Gjykata Supreme konkludon se ankesa e subjektit politik Lëvizja Vetëvendosje (LVV) duhet të miratohet si e bazuar dhe të ndryshohet vendimi i PZAP-it, A.nr.375-2/2019 datë 28.10.2019, si dhe të detyrohet KQZ të bëjë rinumërimin e 4.639 fletëvotimeve të votuesve jashtë Kosovës.

Pas vendimit, ka reaguar Lëvizja Vetëvendosje.

Përmes një postimi në Facebook, Vetëvendosje ka kërkuar që KQZ-ja të mblidhet sa më parë dhe të vijojë me procedurat për numërimin e këtyre fletëvotimeve.

“Sot në ora 16:19 morëm vendimin nga Gjykata Supreme e Republikës së Kosovës, ku u konfirmua e drejta e bashkatdhetarëve tanë dhe më në fund u hap rruga për numërimin e pakove me vota të ardhura prej tyre. Presim që sa më parë, Komisioni Qendror i Zgjedhjeve të mblidhet dhe të marrë vendimin për të vijuar me procedurat e verifikimit dhe numërimit të këtyre fletëvotimeve. E gjithë kjo mund të ishte evituar nëse nga 12 tetori, KQZ-ja do ta kishte lejuar administratën e KQZ-së t’i numëronte këto fletëvotime”, thuhet ndër të tjerash, në reagimin e VV-së.

Votat nga diaspora, sipas afatit ligjor, është dashur të arrijnë në KQZ, 24 orë para ditës së zgjedhjeve.

Nga të numëruarat më herët, Vetëvendosje e udhëhequr nga Kurti, ka marrë 53% të votave.