Video

Mbahet në Prishtinë ecja tradicionale për ndërgjegjësim ndaj kancerit të gjirit

Është mbajtur marshi tradicional “Zbulimi i hershëm është mbijetesë”.

Qytetarë të shumtë u mblodhën para Teatrit Kombëtar për të shënuar përmbylljen e muajit të vetëdijesimit në luftën kundër kancerit të gjirit, raporton KTV.

I gjithë organizimi u përcoll me rrëfimin e Arnisa Osmanit, e mbijetuar nga kjo sëmundje

E, para të pranishmëve, foli edhe kryetarja e organizatës, “Jeta Vita”, Nafije Latifi, e cila tha se ka rritje të vetëdijesimit sa i përket kontrolleve për kancer të gjirit.

Ndërkaq, ish-presidentja Atifete Jahjaga foli për ndihmën që duhet të japin institucionet në këtë drejtim, duke kujtuar se nga janari deri në korrik janë paraqitur 912 raste me të prekur nga kanceri, prej të cilave më shumë se 200 me kancer gjiri.

Në anën tjetër, drejtori i Klinikës së Onkologjisë, Ilir Kurtishi, thotë se është bërë një punë e mirë në vetëdijesimin e qytetarëve për këtë sëmundje.

Të mbijetuarat e kancerit të gjirit u cilësuan si heroina.

Megjithatë, u shpreh nevoja që institucionet duhet të shtojnë e intensifikojnë punën për të ndihmuar të prekurit nga kanceri, në përgjithësi.

Marshi i dymbëdhjetë me radhë vazhdoi deri në Sheshin “Zahir Pajaziti”.