Ish-shefat e Telekomit shpallen të pafajshëm

21 October 2019 15:13

Ish-shefat e Telekomit, Agron Mustafa e Ejup Qerimi dhe ish-kryesuesit të Bordit të këtij institucionit, Rexhë Gjonbalaj janë shpallur të pafajshëm për akuzën e keqpërdorimit të detyrës zyrtare.

Kryetari i trupit gjykues, Lutfi Shala, gjatë leximit të arsyetimit të trupit gjykues, ka thënë se në asnjë rast nuk janë mundur të argumentohen pretendimet e Prokurorisë Speciale për korrupsion kundër tyre, raporton Koha Ditore.

Prokuroria Speciale aktakuzën për këtë rast e kishte ngritur për rastin e kontratës me kompaninë Dardafon të Devollit.

Sipas aktakuzës, nga 19 shkurti 2015 kur Agron Mustafa ishte zgjedhur në postin e Kryeshefit Ekzekutiv të PTK-së e deri me 24 maj 2017, edhe pse nuk kishte qenë kompetent në kontestin mes PTK-së dhe tani të dëmtuarës DARDAFON.net (Z-Mobile), kishte lidhur marrëveshjen për ekzekutimin e vendimit final të arbitrazhit.

Kjo gjë, sipas aktakuzës, ka shkaktuar vonesa në liferimin e Sim-kartelave. Trupi gjykues ka konstatuar se veprimet e tyre ishin në përputhje me obligimet ligjore dhe se Prokuroria s’ka arritur të dëshmoj se këta ish-zyrtarë e kanë dëmtuar buxhetin.

© KOHA. Të gjitha të drejtat janë të rezervuara.

Të ngjashme