Arrestohet një hetues policor në veri, në kërkim edhe shefi i operativës së Policisë

16 October 2019 19:05

Mëngjesi i ka zbardhur në veri të Kosovës, shumë njësite elite të Policisë këtë të mërkurë.

Në 5:00 të mëngjesit, nga Prishtina është nisur edhe ky konvoj me 9 vetura me zyrtarë të Njësisë Speciale Operative, raporton KTV.

Pa shumë zhurmë e qetësisht, në orën 5:50 minuta të mëngjesit ata janë futur në një objekt banimi në rrugën “Filip Vishnjiq”, që është karshi stacionit policor të Mitrovicës Veriore.

Rade Basara, hetues në stacionin e veriut, është arrestuar për keqpërdorim detyre, sepse Prokuroria Speciale dyshon se ai nuk ka kryer obligimet e tij ose ka ndihmuar persona të tjerë të fshehin prova gjatë hetimit të vrasjes së politikanit serb.

Pos kësaj, ai po hetohet edhe për “pjesëmarrje ose organizim i grupit kriminal”.

Por, ai nuk ka vepruar vetëm në kuadër të Policisë së Kosovës.

Kolegët e tij e kanë kërkuar në dy lokacione të ndryshme edhe Zhelko Bojiqin, shef i operativës se Policisë për komunat veriore, por nuk kanë arritur ta gjejnë atë.

Në njërin lokacion, megjithatë, e kanë arrestuar djalin e tij, Vasilje Bojiq, sepse i janë gjetur armë dhe municion, por ai është liruar pasdite në procedurë të rregullt dhe do të hetohet vetëm për armëmbajtje pa leje.

Për Bojiqin, ka pasur raportime se të mërkurën nuk ka qenë fare në Kosovë por në Mal të Zi.

Zyrtarët e institucioneve të sigurisë nuk kanë qenë në gjendje të thonë nëse ndonjë informator brenda Policisë e ka njoftuar atë për mundësinë e arrestimit dhe ai është arratisur.

Por, nuk është përjashtuar mundësia që pas verifikimit të informacioneve për Zhelko Bojiqin të lëshohet urdhërarrest ndërkombëtar.

Ai dhe Rade Basara, sipas provave të Prokurorisë, kanë qenë anëtarë të grupit të organizuar kriminal, të udhëhequr nga nënkryetari i Listës Serbe, Milan Radoiçiq.

Bojiqi, që është avancuar në detyrë në dy vitet e fundit, sipas Policisë, i ka kaluar procedurat e verifikimit të sigurisë, por ky institucion nuk konsideron se këto ngjarje po e vënë në dyshim funksionimin e tërë zinxhirit komandues.
 

Prokuroria tashmë ka kërkuar paraburgim për Basaran, e thotë se do t’i verifikojë mirë informacionet për ta kuptuar vendndodhjen e Zhelko Bojiqit.

Oliver Ivanoviqi u vra më 16 janar të 2018-s, në një atentat herët në mëngjes para selisë së partisë së tij.

Milan Radoiçiq, të cilin vetë Ivanoviqi pak para se të vritej e kishte quajtur ‘sundues të vërtetë dhe të errët të veriut’, është ende gjithashtu në kërkim, si i dyshuar për këtë vrasje.

Ai është parë në disa ngjarje të organizuara në Beograd, e së fundmi u publikuan edhe fotografi të tij në një jaht vite më parë, me ish-zëvendëskryeministrin e parë të Kosovës, Behgjet Pacolli.

Pos Pacollit, kryeministri në detyrë, Ramush Haradinaj, kishte pranuar se ishte marrë vesh me Radoiçiqin për koalicionin me Listën Serbe më 2017, ani se atë kohë ai s’kishte asnjë pozitë në këtë parti.

Serbin Milan Radoiçiq, të lidhur me krimin e organizuar në veri, Haradinaj, në vitin 2018, e kishte takuar në zyrën e tij në Qeverinë e Kosovës.

© KOHA. Të gjitha të drejtat janë të rezervuara.

Të ngjashme