BE-ja dhe ambasadori gjerman të ashpër ndaj insistimit të ministrit Tahiri për noterët e rinj

14 October 2019 19:37

Bashkimi Evropian i ka bërë thirrje publike ministrit të Drejtësisë, në largim, Abelard Tahiri, që të mos e vazhdojë procesin për emërimin e rreth 130 noterëve të rinj.

Në një qëndrim të saj, Zyra e BE-së në Prishtinë ka kërkuar që qeveria në largim të mos marrë asnjë vendim për këtë proces, duke thënë se çfarëdo vendimi duhet t’i lihet qeverisë së re, pas zgjedhjeve të 6 tetorit.

“U bëjmë thirrje autoriteteve në largim të Kosovës të përmbahen nga emërimi i çdo noteri, sepse ne besojmë fuqishëm që vendimi në këtë drejtim duhet t’i lihet qeverisë së re”, thuhet në përgjigjen nga zyra e Bashkimit Evropian, Prishtinë.

Kjo Zyrë mbështetë profesionet e lira ligjore, duke thënë se ato duhet të forcohen pasi janë garantues i kontratave të ligjshme dhe parandaluese të mashtrimeve me dokumentacione.

“Procesi i përzgjedhjes dhe emërimit të rregullt dhe të ligjshëm të noterëve është thelbësor për të nxitur besimin që shoqëria i jep individëve që luajnë këtë rol të përgjegjshëm. Për rrjedhojë, ky proces duhet të jetë i lirë nga çdo pretendim për parregullsi, qofshin ato pretendime të vërteta apo të perceptuara”, thuhet më tej aty.

Përkundër reagimit të Bashkimit Evropian, ministri në largim, Abelard Tahiri, ka thënë se tërë procesi është legjitim dhe se ai “do të marrë epilog legjitim në harmoni me ligjin dhe partneritet me Odën e Noterëve”.

“Sot, përballë ftesës së Zyrës së BE-së për pezullimin e emërimit të noterëve të rinj, si Ministër i Drejtësisë vlerësoj se emërimi i noterëve të rinj, mbi formulën që është paraparë si e domosdoshme dhe emergjente për të përmbushur nevojat e qytetarëve, veçmas komuniteteve jo shumicë, është tërësisht legjitim dhe duhet të ndodhë. Për më tepër, secili nga kandidatët që është testuar dhe ka kaluar fazat e provimit, ka fituar një të drejtë ligjore të cilën unë nuk mund ta hedhë poshtë në mënyrë arbitrare. Një veprim i tillë, do të ishte mesazhi më i rëndë për sundimin e ligjit”, ka thënë Tahiri.

Tahirit i ka reaguar menjëherë ambasadori Gjerman në Kosovë, Christian Heldt, i cili ka thënë se në vend të nxitimit, ministri në largim duhet të marrë seriozisht shqetësimet e Bashkimit Evropian.

“Bashkimi Evropian nxjerrë një qëndrim paralajmërues lidhur me nxitimin për të emëruar noterët sot, përcjellë nga një qëndrim i Ministrit të Drejtësisë së Kosovës, i cili thotë se do të shkojë përpara gjithsesi. Unë rekomandoj fuqishëm që të merren seriozisht shqetësimet e ngritura: Njerëzit këtu nuk mund të shërbehen, nëse aktet noteriale nuk janë të njohura jashtë vendit”, ka thënë Heldt.

Këto reagime të ndërkombëtarëve janë mirëpritur nga organizatat e shoqërisë civile, të cilat përmes një deklarate të përbashkët i kanë përsëritur kërkesat e tyre për ministrin në largim që të mos emërojë asnjë noterë nga lista aktuale dhe t’ia lë këtë çështje ministrit të ri.

Organizatat e shoqërisë civile kanë ftuar policinë dhe prokurorinë që të fillojnë hetimet lidhur me veprime të mundshme kriminale në procesin e përzgjedhjes së noterëve të rinj.

© KOHA. Të gjitha të drejtat janë të rezervuara.

Të ngjashme