Polonia pret zgjedhjet e ndarë me BE-në

13 October 2019 19:32

Polonia ka mbajtur zgjedhjet parlamentare, të cilat pritet të fitojë për herë të dytë Partia Nacionaliste e Ligjit dhe Drejtësisë.

Fitorja e kësaj partie do ta thellojë izolimin e Polonisë që ka pasur marrëdhënie jo edhe aq të mira me Bashkimin Evropian, shkaku i mosangazhimit të saj për t’i rritur standardet demokratike.

Partia Nacionaliste pritet të fitojë më shumë vota se në vitin 2015 dhe mund të sigurojë mjaftueshëm ulëse në parlament, sa për të qeverisur e vetme – por një ndërrim i klimës politike ka polarizuar edhe më shumë këtë shtet.

Nacionalistët, këto zgjedhje i cilësuan si mundësi mes shoqërisë tradicionale katolike dhe lirive të shumta që, sipas tyre, rrezikojnë jetën familjare të polakëve, transmeton KTV.

Partitë opozitare, të cilat janë partnere të BE-së, janë të mendimit se qeveria në shkuarje ka rrezikuar pavarësinë e gjyqësorit dhe medias, ndërsa e ka bërë Poloninë vend jomikpritës për minoritetet seksuale dhe etnike.

Sondazhet kanë treguar se nacionalistët e Partisë së Ligjit dhe Drejtësisë do të fitojnë 40 deri në 46 për qind të votave.

Kjo do t’ia japë një shumicë absolute në Parlament, por me gjasë mund t’i duhet një koalicion për të qeverisur, e të cilin është duke e kërkuar te tri partitë tjera më të vogla ekstreme që mund të fitojnë 5 për qind të votave.

Lidere e opozitës pritet të jetë Partia e Platformës Civile që prihet nga presidenti i Këshillit Evropian, Donald Tusk. Kjo parti është parashikuar se do të fitojë 19 deri në 26 përqind të votave.

© KOHA

Të ngjashme