Luhatjet e LDK-së, paradite thotë se s’komunikon me VV-në pa rezultate e pasdite po

11 October 2019 19:01

Dy versione të ndryshme vetëm brenda dy orëve ka dhënë Lidhja Demokratike e Kosovës, rreth koalicionit të mundshëm qeverisës me Vetëvendosjen.

Pas përfundimit të mbledhjes së kryesisë, e cila zgjati dy orë, zëdhënësi i LDK-së, Besian Mustafa, tha se asnjë takim nuk do të ketë me Vetëvendosjen pa u certifikuar rezultati zgjedhor.

Por, dy orë më vonë, pas takimit me deputetin gjerman të CDU-së, Volkmar Klein, kryetari i LDK-së, Isa Mustafa, ka thënë se nuk ka asnjë vendim që të ketë ngrirje të diskutimeve me Vetëvendosjen.

Mustafa ka shtuar se me Vetëvendosjen nuk do të ketë marrëveshje përfundimtare për koalicion, pa u certifikuar rezultati i zgjedhjeve.

Ai ka shtuar se, megjithatë, nuk do të ketë takim të liderëve, por diskutime mes grupeve punuese të partive.

Por, a është problem për LDK-në që Albin Kurti të jetë kryeministër?

Edhe e kandiduara për kryeministre nga kjo parti, Vjosa Osmani, ka thënë se takimet me Vetëvendosjen për harmonizim të programit qeverisës do të vazhdojnë.

Ka mohuar të ketë pasur kundërshtime në kryesinë e partisë për koalicionin me Vetëvendosjen.

Rreth bashkëpunimit me LDK-në, KTV-ja ka provuar të marrë një qëndrim edhe nga Vetëvendosje, por zyrtarë të saj nuk kanë pranuar të flasin.

Në bazë të rezultateve të KQZ-së, Vetëvendosje del të jetë partia e parë, me rreth 5 mijë vota më shumë sesa LDK-ja.

© KOHA. Të gjitha të drejtat janë të rezervuara.

Të ngjashme