Viktima të një hakmarrjeje politike, e cilësojnë veten të akuzuarit në “Syri i Popullit”

4 nga 10 të akuzuarit në procesin gjyqësor “Syri i Popullit”, kanë dhënë mbrojtjen e tyre këtë të enjte, para gjykatës.

Proces gjyqësor i skenarit për ta shpallur lëvizjen Vetëvendosje të jashtëligjshme - e ka cilësuar gjithë këtë i akuzuari në rastin ‘Syri i Popullit’, Sadri Ramabaja.

Për më shumë se 2 orë, Ramabaja është marrë në pyetje nga trupi gjykues derisa ka thënë se veten e cilëson si viktimë të këtij skenari, i cili, sipas tij, ishte hakmarrje e karakterit politik, raporton KTV.

Në mbrojtjen e tij, Ramabaja ka thënë se ka informata se nuk ishte zbatuar urdhri i prokurorisë për arrestimin e Murat Jasharit ditën kur ai kishte hyrë në Kosovë, e që më pas kishte çuar në plagosjen e Azem Vllasit.

Ramabaja, më tutje, ka thënë se trupi gjykues nuk duhet t’i marrë si të mirëqena deklaratat e të akuzuarit Murat Jashari, derisa dihet gjendja mendore e tij.

Derisa ai është marrë në pyetje edhe për paralajmërimet që kishte marrë për likuidimin e tij.

Në orët e pasdites, mbrojtjen e tyre e kanë dhënë edhe tre të akuzuarit e tjerë, Sabit Berisha, Halim Halimi dhe Bexhet Luzha.

Ky i fundit, gjatë deklaratës së tij, ka thënë se për shkak të gjendjes së tij mendore, beson se me Mutrat Jasharin ka manipuluar një person me emrin Metush Zenuni, i cili jeton në Zvicër.

Në këtë seancë, që të gjithë të akuzuarit kanë mohuar të kenë qenë në dijeni për organizatën Syri i Popullit dhe veprimtarinë e saj.

Sadri Ramabaja, Murat Jashari, Ragip Sallova, Avni Llumnica, Sabit Berisha, Bexhet Luzha, Halim Halimi, Bajrush Konjusha, Lirije Luzha dhe Rexhep Topllana akuzohen nga Prokuroria Speciale për përgatitje të veprave terroriste ose veprave penale kundër rendit kushtetues dhe sigurisë, për vrasje të rëndë në tentativë si dhe vepra të tjera penale.