Pa asnjë incident, qindra persona marshojnë në Prishtinë në përkrahje të LGBTI-së

10 October 2019 19:15

Muajin e kaluar bëri bujë një fotografi e shkrepur në Beograd, ku shkruhej “Shqiptarët janë vëllezërit tanë”.

E njëjta tani është sjellë në Prishtinë dhe Filip Vuloviq, një prej organizatorëve të Paradës së Krenarisë në Beograd, tregon arsyet.

“Është i rëndësishëm sepse tregon që ne jemi mbi politikën, marrëdhënieve që politika dhe mediat krijojnë, dhe vetëm duam të ardhme më të mirë për njerëzit tanë”, ka thënë Filip Vuloviq, organizator i “Belgrade Pride Parade”, raporton KTV.

Ndërsa Natale Samenkovi nga organizata Civil Rights Defenders, tregon se, pavarësisht telasheve të vogla, komuniteti LGBTI, po pranohet në Serbi.

“Po bëjmë një punë të mirë në edukimin e komunitetit rreth nesh dhe gradualisht po na pranojnë”, ka thënë Natale Samenkoviq nga “Civil Rights Defenders”.

Vuloviç e Samenkoviç, nuk ishin të vetmit që kishin ardhur në solidarizim dhe mbështetje të Paradës së Krenarisë në Prishtinë dhe aty pati edhe nga shtete të ndryshme të botës.

Në mesin e shumë personaliteteve që erdhën për të treguar mbështetje, ishte edhe ambasadori i SHBA-së në Kosovë, Philip Kosnett, që në një prononcim ekskluziv për KTV-në theksoi se drejtësia nënkupton të drejta dhe mundësi të barabarta për të gjithë.

“Java e Krenarisë, duhet të jetë viti i krenarisë. Çdo ditë e vitit duhet të jetë ajo kur secili në Kosovë punon për të drejtat e të gjithë qytetarëve, pavarësisht komunitetit. Një prej gjërave që më emocionojnë më shumë lidhur me “Javën e Krenarisë” është se nuk bëhet nga angazhimi i ndërkombëtarëve, por është puna e qytetarëve të Kosovës, që po punojnë për të ndërtuar të ardhme më të mirë”, ka thënë Kosnett.

Dy prej organizatorëve të kësaj ngjarjeje që në Prishtinë u mbajt për herë të tretë, treguan për problemet me të cilat po ballafaqohet ky komunitet në Kosovë.

Nën mbikëqyrje të forcave të shtuara të Policisë së Kosovës, marshi që nisi në sheshin “Skënderbeu” përfundoi në atë “Zahir Pajaziti”.

Përmbyllja u bë me mesazhin e Lend Mustafës, një prej aktivistëve më të njohur për të drejtat e komunitetit LGBTI, që zbërtheu moton e paradës së këtij viti ... “Për kon t’rreh zemra”.

© KOHA. Të gjitha të drejtat janë të rezervuara.

Të ngjashme