Gjykata Themelore e Prishtinës ka refuzuar kërkesën për paraburgim, për gjykatësin dhe policin e Skenderajt.
Këtë masë, Gjykata e ka zëvendësuar me arrest shtëpiak ndaj gjyqtarit të Gjykatës Themelore të Mitrovicës, dega në Skenderaj, Rafet Ismajli, dhe zyrtarit policor Blerim Gashi.
Sipas prokurorit të rastit, Blerim Isufaj, të dy zyrtarët kishin qenë nën vëzhgim prej katër muajsh, raporton KTV.
Ndërkaq, pala mbrojtëse e gjyqtarit thotë që klienti i tij nuk ka marrë asnjë shumë të hollash.
KTV-ja mëson nga burime të afërta me hetimet se gjyqtari në fjalë ka thënë që kishte marrë hua e jo ryshfet. Tutje, sipas informacioneve, kjo ka të bëjë me një rast të veteranëve.
Për shkak të hetimeve që janë nisur ndaj gjyqtarit Rafet Ismalji, Këshilli Gjyqësor i Kosovës e ka pezulluar atë nga puna deri në përfundim të procedurës penale.
Në anën tjetër, edhe avokati i Blerim Gashit i ka mohuar dyshimet që janë vënë mbi klientin e tij.
Avokati, më tutje, ka shtuar se do të bëjë ankesë në Gjykatën e Apelit ndaj masës së sigurisë.
E, Gashi është suspenduar nga Policia e Kosovës për 48 orë. Ndërkaq, në një përgjigje për KTV-në, Inspektorati Policor ka thënë se do ta rekomandojë vazhdimin e suspendimit deri në përfundimin e procedurës penale.
Javën e kaluar, me urdhër të Prokurorisë Speciale, ishte arrestuar edhe Sali Berisha, gjyqtar në Gjykatën Themelore të Pejë, mbi të cilin rëndojnë të njëjtat akuza. Gjykata Themelore në Prishtinë, atij ia kishte caktuar masën e paraburgimit prej një muaji, çka ishte kundërshtuar nga ana e mbrojtjes në Gjykatën e Apelit.
Kjo e fundit, këtë të premte, e ka lënë në fuqi masën e paraburgimit ndaj Berishës.
© KOHA. Të gjitha të drejtat janë të rezervuara.
