Hadërgjonaj në Prishtinë e Bashota në Hagë, intervistohen nga Specialja

19 September 2019 19:06

Për gjatë 4 orëve, ish-deputetja e PDK-së, Safete Hadërgjonaj, është marrë në pyetje nga prokurorët e Zyrës së Prokurorit të Specializuar.

Në mungesë të vizës, Hadërgjonaj është marrë në pyetje në selinë e EULEX-it në Prishtinë.

Hadërgjonaj ka thënë se është pyetur në cilësinë e dëshmitares, por nuk ka treguar konkretisht për çfarë kanë qenë të interesuar hetuesit e prokurorët e Speciales.

Hadërgjonaj ka thënë se ka dëshmuar për luftën e drejtë të UÇK-së.

Për dy ditë me radhë, në Hagë është intervistuar në cilësinë e të dyshuarit edhe ish-zëvendëskomandanti i Shtabit të Përgjithshëm të UÇK-së, Sokol Bashota, i cili të mërkurën në mesnatë, është kthyer në Prishtinë.

Bashota ka përmendur se prokurorët e Speciales i kanë ofruar një marrëveshje, por të cilën ka thënë se e ka refuzuar.

Ndërkaq, gjatë së mërkurës, në Slloveni është intervistuar nga Specialja edhe Naim Maloku, ish-epror i UÇK-së.

Gjithashtu, të mërkurën është marrë në pyetje nga Zyra e Prokurorit të Specializuar në cilësinë e dëshmitares edhe ish-deputetja e AAK-së, Time Kadrijaj.

© KOHA. Të gjitha të drejtat janë të rezervuara.

Të ngjashme