Video

Pas raportimit të KTV-së e presionit, Ministria e Integrimit i anulon konkurset e kontestuara

Ministria e Integrimit Evropian është dorëzuar përballë presionit publik lidhur me konkurset e kontestuara.

Pas anulimit të konkursit për pozitën ‘Zyrtare e lartë për asistencë zhvillimore’, ministria që udhëhiqet nga ministrja në largim e PDK-së, Dhurata Hoxha, anuloi të mërkurën edhe katër konkurse për punësime në shërbimin civil të kësaj ministrie, raporton KTV.

Konkurset ishin shpallur në kundërshtim me marrëveshjen ndërmjet Qeverisë dhe BE-së, e cila parasheh punësimin në shërbimin civil të bursistëve nga Skema e profesionistëve të rinj.

Në grupin për Studime Juridike dhe Politike e vlerësojnë si të duhur vendimin për anulimin e konkurseve. Mirëpo, për ta është shqetësuese që kjo ka ndodhur vetëm pas reagimeve të shumta publike.

Allen Meta nga Instituti “Demokracia për Zhvillim”, thotë se rrezikohet ndërprerja e këtyre skemave të BE-së, në rast se përsëriten praktika të tilla.

Muajin e kaluar, KTV-ja kishte raportuar për shpalljen e këtyre konkurseve, hap ky që u konsiderua si tentim për punësim të militantëve partiakë, duke shpërfillur bursistët që kanë kryer studimet në Evropë përmes programit ‘Young Cell’.

Përpos shoqërisë civile, për këto konkurse kishte reaguar ashpër edhe Zyra e Bashkimit Evropian në Kosovë.