Reportazhi i BBC-së për Kosovën: Gjeneratat e reja, shpresë për shqiptarët e serbët

Ariani, 20-vjeçar mësyn urën e Ibrit kah ana jugore, e në anën e kundërt po vjen Selena, 16-vjeçare. Për shqiptarin ky është takimi i parë me një pjesëtar të komunitetit serb.

Me gjithë hezitimin, shkas i takimit është bërë reportazhi i BBC-së që i ka dhënë dritë historisë dhe situatës aktuale politike në Kosovë.

“Disa nga ne kemi urrejtje për ju, e disa nga ju na urreni neve. Ne duhet të ecim përpara, ta lëmë të kaluarën mbrapa. Jo ta harrojmë, por vetëm ta lëmë mbrapa”, ka thënë Ariani.

“Nëse nuk e harrojmë, do të mbesim këtu ku jemi”, thotë Selena.

“Ti thua ta harrojmë të kaluarën, por ju nuk jeni dëmtuar nga ne, prandaj kurrë nuk do ta dish se çfarë ndjenje është”, thotë më tej Ariani.

Rrëfimi i reporteres Jean Mackenzie është realizuar në Mitrovicë, andej e këndej lumit Ibër.

BBC-ja raporton se tani kur kanë kaluar 20 vjet pas luftës, shpresa për paqe varet vetëm nga gjeneratat e reja, ndërsa pyet nëse kjo gjeneratë mund të lërë anash dallimet për të arritur deri te paqja.

Ariani dhe Selena janë dy të rinj që janë rritur pas luftës, por e kaluara e tyre ua ka formësuar bindjet për Kosovën. Ariani thotë se Kosova është e pavarur dhe se nuk i përket Serbisë, derisa Selena e ndjen se po jeton në tokë serbe.

Ariani, në gjuhën angleze, rrëfen për vështirësitë e luftës dhe vrasjen e xhaxhait të tij, teksa shton se bletaria ia lehtësoi vështirësitë familjes dhe e ndihmoi të rindërtojë jetën në vendin e shkatërruar.

“Ne jemi të gjithë të lodhur. Vetëm duam që gjërat të bëhen më mirë. Për familjet tona, për ekonominë dhe për vendin tonë”, deklaron Ariani.

Në anën veriore të urës jeton Selena me familjen e saj pesë anëtarëshe. E pyetur se si është të rritesh në Mitrovicë, ajo thotë se këto vite, jeta ka qenë e vështirë.

“Ne mendojmë që shqiptarët nuk i duan serbët, e ata gjithashtu mendojnë se serbët nuk i duan shqiptarët. Unë tani jam e lumtur, por në fakt nuk e shoh veten këtu bashkë me fëmijët e mi”, shprehet Selena.

Gazetarja Mackenzie tregon për urën e Ibrit që është pikë ndarëse e dy pjesëve të qytetit. Ajo thotë se ura është e bllokuar për qarkullim të automjeteve dhe ka forca ushtarake italiane, e në fund thekson se ndjesia që ajo ta jep, është sikur të ishte “tokë e askujt”.

Për Mitrovicën e Veriut raporton se është e mbushur me flamuj serbë, ndërsa e vë në siklet Selenën 16-vjeçare kur e pyet nëse e njeh pavarësinë e Kosovës.

“Është një pyetje e vështirë. Jemi pjesë e Serbisë. Nëse detyrohem, atëherë e njoh. Nëse flas për Kosovën Republikë, njerëzve nuk u pëlqen dhe pastaj nuk do të më duan as mua”, tha Selena.

Të dy të rinjtë, andej e këndej urës së Ibrit, do të donin që të gjenin rrugë për të ecur përpara, mirëpo pa e harruar të kaluarën.

Selena thotë se nëse duhet të jetojnë në Mitrovicë, atëherë duhet ta bëjnë së bashku shqiptarë e serbë, ndërsa Ariani lutet që të mos ketë urrejtje dhe dy komunitetet të jetojnë në paqe.