Lideri i opozitës në Korenë Jugore rruan kokën për të kundërshtuar ministrin e Drejtësisë

Lideri i opozitës në Korenë e Jugut i është shtuar listës së politikanëve që po rruajnë kokat si shenjë pakënaqësie ndaj qeverisë.

Para përkrahësve dhe gazetarëve, Hwang Kyo-ahn ka rruar kokën në afërsi të pallatit presidencial, raporton KTV.

Shkak i rruajtjes së kokës është bërë ministri i ri i Drejtësisë, Cho Kuk, familja e të cilit është përfshirë në akuza për korrupsion.

Për të njëjtin rast, javën e kaluar dy deputete rruan kokën.

Të tre politikanët i përkasin partisë konservatore dhe kundërshtojnë qeverinë e tanishme të presidentit Moon Rae-in.

Ata duan që Cho Kuk, një ish-profesor i juridikut, të japë dorëheqje ose të shkarkohet nga presidenti që e ka krah të djathtë.

Situata është përkeqësuar edhe më shumë pasi Kuk u nominua për postin e ministrit ani pse akuzat për mashtrime akademike dhe krime financiare po qarkullonin tash e disa muaj.

Bashkëshortja e tij, gjithashtu profesoreshë, është akuzuar se ka bërë dokumente false me qëllim që vajza e saj të pranohej në universitet dhe të siguronte bursa. Këto mashtrime kanë nxitur pakënaqësi te studentët e universitetit.

Koreja Jugore ka traditë qindra vjeçare të rruajtjes së kokës në formë proteste.

Rruajtja e kokës është parë si një mënyrë praktike për të dëshmuar angazhimin në një kauzë të caktuar.

Në vitin 2018, qindra gra e rruan kokën në një marsh protestues ndaj fshehjes së kamerave nëpër tualete dhe dhoma të zhveshjeve për të filmuar gratë.