416 policë të rinj premtojnë angazhim për siguri

13 September 2019 19:26

Pallati i Rinisë në kryeqytet, ka ushtuar mëngjesin e së premtes nga parakalimi i kadetëve të Policisë së Kosovës, që shoqëroheshin me duartrokitjet e qindra familjarëve të tyre.

Pas 34 javëve të kaluara në Akademinë Kosovare për Sigurinë Publike, 416 kosovarë dhe pjesëtarë të pakicave, kanë diplomuar për të nisur zyrtarisht angazhimin e tyre në këtë institucion, raporton KTV.

31 % e të diplomuarve janë gra, fakt që e ka përmendur Drejtori i Policisë, Rashit Qalaj.

Angazhimin e të diplomuarve që të mos lëkundet besueshmëria në Policinë e Kosovës e ka kërkuar ministri në detyrë i Punëve të Brendshme, Ekrem Mustafa.

Porosi e urime për të diplomuarit kanë pasur edhe Drejtori i përgjithshëm i Akademisë për Siguri Publike, Ismail Smakiqi, Jan Braathu nga Misioni i OSBE-së e Kimberly Riffe nga ICITAP.

Përfaqësuesi i kadetëve, Pajtim Thaçi, u zotua për angazhimin në mbrojtjen e të drejtave të të gjithë qytetarëve.

Pas betimit dhe shpërndarjes së certifikatave, kadetët mezi kanë pritur momentin për të hedhur përpjetë kapelat e tyre.

Po këtë ditë, ata e kanë kuptuar se në cilat zona janë të caktuar për të nisur shërbimin e tyre.

Policia e Kosovës, së fundmi shënoi 20-vjetorin e themelimit. Me të diplomuarit e kësaj gjenerate, numrin e pjesëtarëve të uniformuar e çon në mbi 8300, e me stafin civil, ky numër rritet për 1000.

© KOHA. Të gjitha të drejtat janë të rezervuara.

Të ngjashme