Qeveria çeke del kundër Presidentit Zeman: Nuk e tërheqim njohjen e Kosovës

“E dua Serbinë, e popullin serb. Nuk e dua Kosovën”, dëgjohet duke i thënë Vuçiqit, Presidenti shëndetlig i Republikës Çeke, Milos Zeman.

Kosova mund të anulojë pjesëmarrjen e planifikuar në Samitin e Pragës, që do të mbahet të enjten, në mes të kryeministrave të katër shteteve të Vishegradit dhe atyre të shteteve të Ballkanit Perëndimor, ka njoftuar Agjencia Çeke e Lajmeve, raporton KTV.

Qeveria e Kosovës nuk ka qenë në gjendje të mërkurën të konfirmojë nëse Kosova do të marrë pjesë në samit apo jo.

Refuzimi i mundshëm i Kosovës për të marrë pjesë në takimin e së enjtes, vjen si kundërpërgjigje ndaj deklaratave të Presidentit çek, Milosh Zeman, i cili, ditë më parë, kishte deklaruar se do t’i diskutojë mundësitë kushtetuese që Republika Çeke të tërheqë njohjen e Pavarësisë së Kosovës.

Por, në një qëndrim në Twitter, Ministri i Jashtëm çek, Tomash Petriçek, ka kundërshtuar presidentin Zeman, duke thënë se Republika Çeke nuk e ka ndryshuar qëndrimin e saj për njohjen e Kosovës.

“Qeveria Çeke, e cila është përgjegjëse për politikën e jashtme, nuk e ka ndryshuar qëndrimin e saj për Kosovën ose ndonjë prej shteteve të Ballkanit Perëndimor. Ne do të vazhdojmë të mbështesim dialogun mes Serbisë dhe Kosovës dhe rrugën e tyre drejt Bashkimit Evropian”, ka thënë Tomash Petriçek, ministër i Jashtëm i Republikës Çeke.

Pas Petriçekut, ka reaguar edhe Ministri i Punëve të Jashtme, Behgjet Pacolli, i cili ka shkruar se homologu i tij çek i ka konfirmuar mbështetjen ndaj “Kosovës, shtet i pavarur e sovran”.

“Republika Çeke sot përmes Ministrit të saj të Punëve të Jashtme, Tomáš Petříček, ka konfirmuar mbështetjen e fuqishme për Kosovën si shtet të pavarur dhe sovran dhe integrimin e saj në BE, NATO dhe Organizata Ndërkombëtare. Miqësia dhe partneriteti ynë është i fortë si guri. U bëj thirrje të gjithëve që të mos bien në grackën e Beogradit për të përhapur lajme që nuk kanë asnjë lidhje me realitetin. Nuk ka asnjë çnjohje të Kosovës, vetëm rrugë përpara për ta bërë Kosovën më të fortë dhe si pjesë e barabartë e bashkësisë ndërkombëtare”, ka thënë Pacolli.

Burime të Agjencisë Çeke të Lajmeve thonë që momentalisht nuk ka mysafirë të konfirmuar nga Kosova për këtë takim në nivel kryeministrash.

Republika Çeke e ka njohur Kosovën më 21 maj 2008, por Presidenti, Milosh Zeman, ka refuzuar të pranojë kredencialet duke mbajtur përfaqësimin diplomatik në nivel të të ngarkuarve në punë, e jo ambasadorëve.