Konkurrenca për një ulëse deputeti, gati 10 për 1

Në garë për 120 ulëse në Kuvendin e Kosovës për zgjedhjet e 6 tetorit, janë 1,070 kandidatë nga 25 subjekte politike.

Komisioni Qendror i Zgjedhjeve ka certifikuar 4 subjektet e fundit, të cilat kanë aplikuar për pjesëmarrje në zgjedhjet e parakohshme parlamentare, raporton KTV.

LDK-ja, PDK-ja koalicioni AAK-PSD dhe VAKAT janë certifikuar këtë të martë.

Kryetarja e KQZ-së, Valdete Daka, tha se janë miratuar të gjitha aplikacionet e subjekteve politike dhe kandidatët e tyre.

Në kuadër të subjekteve të certifikuara, është edhe kandidati i vetëm i pavarur, Esmir Kasi.

Kryetarja e KQZ-së ka thënë se ky institucion po vazhdon me certifikimin e vëzhguesve të zgjedhjeve, për çka interesim kanë shprehur organizata vendore, por edhe ndërkombëtare.

Më 17 shtator hidhet shorti i renditjes së subjekteve në fletëvotim.

Kuvendi i Kosovës ka 120 ulëse, prej të cilave 20 janë të garantuara për komunitetet joshumicë, përkatësisht 10 për komunitetin serb dhe 10 për komunitetet tjera.