Qytetarët i gëzohen fitores së Kosovës në futboll, por jo përzierjes së politikës në të

08 September 2019 19:16

Fitorja e Përfaqësueses së Kosovës në ndeshjen e së shtunës ndaj Republikës Çeke i ka entuziazmuar qytetarët e vendit. Për qytetarët, fitorja e Kosovës ishte më se e mirëpritur, derisa, sipas tyre, kjo fitore i ka emocionuar ata pa masë, sidomos pas ngjarjeve të fundit në vend.

Për një pjesë të qytetarëve përzierja e politikës me futbollin cilësohet si gjest i ulët, raporton KTV.

Derisa ka prej atyre që bëjnë thirrje që sporti të mos politizohet, porse të ruhet nga infektimi politik.

E, me fitoren e Kosovës, i kënaqur u nda edhe Emiljano Toshkezi, qytetar nga Shqipëria që në Kosovë erdhi për vizitë. Sipas tij, lavdet për Kosovën janë të mirëseardhura, derisa dallimet në nocionet kombëtare dhe përfaqësuese mes dy ekipeve nuk duhet të ekzistojnë.

Kosova ndeshjen tjetër e zhvillon më 10 shtator kundër Anglisë, në stadiumin St. Mary, derisa lavdet për djemtë kosovarë nga mediumet e huaja nuk munguan.

E përditshmja ‘’Daily Mail’’ publikoi një shkrim të veçantë që flet për historinë e Kosovës dhe djemve kosovarë, duke i kushtuar rëndësi rrugëtimit të Florent Hadërgjonajt. Ndërsa, gazeta tjetër ‘’The Telegraph’’ i kushtoi një shkrim të veçantë Kosovës dhe sfidave të saj si një shtet i dalë nga lufta, ku në detaje u fol për raportet mes Kosovës dhe Serbisë, si dhe serisë së mrekullueshme prej 15 ndeshjeve pa humbje para përballjes me Anglinë.

© KOHA. Të gjitha të drejtat janë të rezervuara.

Të ngjashme