Liderët e G7-s nisin diskutimet, nën trysninë e protestave

Liderët e shteteve anëtare të G7-s janë mbledhur në ditën e parë të punimeve të samitit të sivjetshëm.

Në mëngjes, kishte një takim mes presidentin amerikan Trump dhe kryeministrit britanik, Johnson.

Temat kryesore ishin BREXIT-i dhe raportet mes shteteve pas daljes nga BE-ja.

Donald Trump e ka përshkruar Boris Johnsonin si njeriun e duhur për ta realizuar BREXIT-in.

“Boris nuk ka nevojë për këshilla, pasi ai është njeriu i duhur për këtë punë. Sa u përket marrëdhënieve ekonomike, do ta nënshkruajmë marrëveshjen më të madhe ekonomike që kemi pasur ndonjëherë”, ka thënë Trumpi.

E sa u përket tarifave ndaj Kinës, Trumpi tha se nuk e ka ndërmend t’i heqë ato.

Derisa ka lëkundje të ekonomisë globale, probleme në Lindje të Mesme dhe kur po vazhdon djegia e pyjeve të Amazonës, liderët botërorë besojnë se mund të zgjidhin ndonjë prej tyre.

Trump, po ashtu, pritet të përballet me kundërshtime nëse vazhdon të insistojë se Moska duhet të kthehet në grup që dikur quhej G8. Rusia ishte përjashtuar nga ky grup pas aneksimit të Krimesë në mars të 2014-s.

Anëtarët e tjerë të G7-s kishin vendosur sanksione ndaj veprimeve të Moskës kundrejt Ukrainës.

Sidoqoftë, derisa liderët janë brenda dhe diskutojnë shumë tema, jashtë objektit ku ata po qëndrojnë po mbahen protesta. Vetëm të shtunën janë arrestuar rreth 70 persona.

Gjatë gjithë samitit janë në detyrë 13.200 policë dhe forca të xhandarmërisë, kryesisht kundër mundësisë së ndonjë sulmi terrorist.