Pronarët e autobusit rrëfejnë për sulmin në Krushevc, Kosova ankohet se s’ka liri të lëvizjes

25 August 2019 19:11

Pak orë para mesnatës, një autobus me rreth 80 udhëtarë kosovarë që udhëtonin drejt Gjermanisë është sulmuar në Krushevc të Serbisë.

Personi i cili ka gjuajtur me gurë autobusin e kompanisë turistike nga Kosova, ende nuk është identifikuar, ndonëse rasti është lajmëruar në policinë e zonës së Krushevcit, raporton KTV.

Ibrahim Veselaj nga kompania, derisa ka shpjeguar se si ka ndodhur rasti, ka thënë se nga ky sulm nuk është lënduar askush. Sipas tij, ky sulm është i pari që i është bërë kompanisë që ai drejton.

Sulmin ndaj autobusit e kanë dënuar edhe nga Ministria e Punëve të Jashtme.

Jetlir Zyberaj nga kjo ministri, për Kohavisionin ka thënë se nuk ka siguri për qytetarët e Kosovës që të udhëtojnë nëpër Serbi, derisa ka kërkuar përgjegjësi dhe garanci nga Serbia.

“Ne e dënojmë fuqishëm sulmin ndaj autobusit që udhëtonte nga Kosova përmes Serbisë. Ky sulm tregon përsëri pengesat me të cilat përballen qytetarët e Kosovës gjatë udhëtimit nëpër Serbi. Nuk ka liri të lëvizjes. Ne jemi thellësisht të shqetësuar që sulmet e vazhdueshme, si ajo në Konsullatën e Kosovës në Kopenhagë dhe tani ndaj autobusit nuk po ndalen nga Beogradi dhe po mbështeten nga mekanizmat e sigurisë serbe. Përderisa ministri Daçiq, si ish-zëdhënës i Millosheviqit, i bën të gjitha përpjekjet e tij për lajme të rreme dhe propagandë kundër Kosovës, ai duhet të përqendrohet në ndalimin e incidenteve që janë iniciuar nga vetë Beogradi. Ne jemi në kontakt me BE-në dhe kërkojmë përgjegjësi të plotë dhe garancion nga Beogradi për sigurinë nëse qytetarët tanë udhëtojnë nëpër Serbi. Gjithashtu, përsërisim thirrjen e MPJ së Kosovës, që të shmanget udhëtimi nëpër Serbi, përderisa nuk ka siguri për kosovarët dhe incidentet vazhdojnë. Kjo është vazhdimësi e incidenteve dhe jo rast i izoluar”, ka thënë ndër të tjerash Zyberaj.

Edhe ministri në detyrë i Punëve të Jashtme, Behgjet Pacolli, përmes një postimi në Twitter, ka kërkuar që sulmet ndaj kosovarëve të ndalen, derisa ka kërkuar ndihmë edhe nga BE-ja.

Sulme të tilla ndaj kosovarëve që kanë udhëtuar për në vendet e Bashkimit Evropian përmes Serbisë, kanë ndodhur edhe në të kaluarën.

© KOHA. Të gjitha të drejtat janë të rezervuara.

Të ngjashme