LDK vendos të hënën për kandidatin për kryeministër dhe koalicionin me VV-në

Një ditë pasi u zgjodhën, anëtarët e kryesisë së Lidhjes Demokratike të Kosovës mbajtën edhe mbledhjen e parë.

E megjithëse pritej nga aty të dilte një emër për kandidatin për kryeministër të kësaj partie që do t’i propozohej këshillit të përgjithshëm, një gjë e tillë nuk ndodhi.

Megjithëse jo-zyrtarisht u kuptua që për mandatar do të jetë Vjosa Osmani, një gjë të tillë nuk e pohoi e as mohoi ajo pas mbledhjes, raporton KTV.

Diskutimet për mandatarin, do të vazhdojnë në fillim të javës tha edhe Besian Mustafa, zëdhënës i LDK-së.

Përveç diskutimeve, as për çështjen e koalicionit me Lëvizjen Vetëvendosje nuk është arritur pajtim, e sipas Mustafës, kjo çështje do të diskutohet në Këshillin e Përgjithshëm, por vijat e kuqe të kësaj partie, janë rikonfirmuar për PDK-në.

Në këtë mbledhje, nuk u panë dy prej anëtarëve të kryesisë, kryetarët e komunave Agim Veliu e Lutfi Haziri, e për arsyet e mungesës së tyre nuk pati ndonjë informatë zëdhënësi Mustafa. E në këtë mbledhje, Arban Abrashi u zgjodh sekretar organizativ i LDK-së.

Mbledhja e ardhshme e kryesisë, është paralajmëruar për të hënën.

Përndryshe, pas mbledhjes së këshillit të LDK-së, kryetari Isa Mustafa, tha se nuk do të heqin dorë nga posti i kryeministrit dhe se preferojnë që të shkojnë të vetëm në zgjedhje.