Mustafa: Veselit do t’i besonim sikur të thoshte “do të kultivojmë korrupsion”

23 August 2019 23:21

Lidhja Demokratike e Kosovës ende nuk ka vendosur se kush do të jetë kandidati i kësaj partie për kryeministër në zgjedhjet e parakohshme parlamentare.

Derisa kryetari i kësaj partie, Isa Mustafa, njoftoi se diskutimet për këtë çështje do të nisin të shtunën, Lutfi Haziri ka thënë se Lidhja Demokratike do të dalë me emrin e kandidatit “për më pak një javë”.

Mustafa tha se LDK-ja ka kuadro të cilave mund t’u besohet kjo përgjegjësi, por se për këtë do të vendosë Këshilli i Përgjithshëm, raporton KTV.

Duke komentuar ultimatumin që zyrtarë të Vetëvendosjes i kanë vënë LDK-së për të vendosur për koalicionin deri në fund të kësaj jave, Mustafa deklaroi se “askush nuk i merr seriozisht deklarimet në ekrane televizive, por vetëm diskutimet në tavolinë”.

Pasi tha se kanë interes për një koalicion me Lëvizjen Vetëvendosje, kreu i LDK-së tha se me Albin Kurtin, nuk kanë biseduar për ndarje pozitash.

Megjithatë, Mustafa theksoi se LDK-ja nuk heq dorë nga posti i kryeministrit në koalicion parazgjedhor dhe se preferon të shkojë e vetme në zgjedhje.

I pyetur për fushatën e kryetarit të PDK-së, Kadri Veseli, që proklamon luftën ndaj korrupsionit, ai tha se korrupsionin nuk mund ta luftojnë ata që e kanë mbjellë atë.

Në mbledhjen e së premtes, Këshilli i Përgjithshëm i Lidhjes Demokratike ka zgjedhur 33 anëtarët e rinj të Kryesisë së partisë, prej tyre nëntë gra.

Ndërkohë, Isa Mustafa ka paralajmëruar një takim edhe me kryeministrin në dorëheqje, Ramush Haradinaj, për siç ka thënë, “jo koalicion, por për tema të rëndësishme”, për të cilat mund të bashkëpunojnë në të ardhmen.

© KOHA. Të gjitha të drejtat janë të rezervuara.

Të ngjashme