Numri rekord i zjarreve në pyjet e Amazonës duhet të shihet si “krizë ndërkombëtare”

Çdo minutë, pylli i Amazonës është duke humbur hapësirë sa një stadium futbolli, nga zjarri që po vazhdon tash e 2 javë.

Gjendja në Brazil ka ngritur shqetësime në mbarë botën, përfshirë zyrtarë të lartë shtetesh, raporton KTV.

Presidenti francez, Emmanuel Macron, ka bërë thirrje që çështja e zjarreve në Amazon të jetë në krye të agjendës në samitin e G7-s.

Por, Presidenti brazilian, Jair Bolsonaro, u përgjigj duke akuzuar Macronin se është duke përdorur çështjen për “përfitim politik”.

Bolsonaro, që në shtetin e tij po akuzohet se i ka shtyrë banorët që të djegin fushat në Amazonë, tha se deklaratat e Presidentit francez nxisin “mentalitet të gabuar kolonialist”.

Mijëra zjarre po shkatërrojnë pyjet e Amazonës në Brazil , më të fortat për gati një dekadë.

Instituti Kombëtar për Kërkimin në Hapësirë thotë se të dhënat e tij satelitore tregojnë një rritje prej 85% të zjarreve krahasuar me periudhën e njëjtë, më 2018.

Shifrat zyrtare tregojnë se më shumë se 75,000 zjarre pyjore janë regjistruar në Brazil në tetë muajt e parë të vitit - numër ky, më i larti që nga viti 2013.

Aktivistët thonë se retorika antimjedisore e Presidentit brazilian, Jair Bolsonaro, ka inkurajuar aktivitete të tilla.

Si përgjigje, Bolsonaro, një skeptik i ndryshimeve klimatike, për një kohë të gjatë madje akuzoi organizatat joqeveritare se filluan vetë zjarret për të dëmtuar imazhin e Qeverisë së tij.

Ai më vonë tha se Qeverisë i mungonin burimet për të luftuar zjarret.

Zjarret nga Amazona kanë lëshuar sasi të madhe të dyoksidit të karbonit, më i larti që nga viti 2010.

Ato gjithashtu, kanë liruar monoksid karboni në nivele të larta, një gaz i lëshuar kur druri digjet.

Një numër i vendeve të tjera në pellgun e Amazonës, një zonë prej 7.4 milionë km katrorë, janë prekur gjithashtu nga zjarret këtë vit.

Pylli më i madh në botë, Amazona, është jetik, pasi që ngadalëson ritmin e ngrohjes globale dhe mundëson 20% të oksigjenit në gjithë planetin.

Ajo është, gjithashtu, shtëpi për rreth tre milionë lloje të bimëve dhe kafshëve dhe një milion njerëz indigjenë.