Me duartrokitje, deputetët vetëshpërndahen për t’i hapur rrugë zgjedhjeve të reja

22 August 2019 19:04

Rrallëherë këto dy vjet ka ndodhur që mbi 100 deputetë të jenë prezentë në një seancë të Kuvendit të Kosovës dhe kjo ka ndodhur vetëm në seancën kur u votua për shpërndarjen e tij.

89 deputetë votuan për dhe duartrokitën, për një tjetër legjislaturë që nuk arriti ta çojë deri në fund mandatin 4-vjeçar.

Pasi deputetët nënshkruan për herë të fundit dhe zunë vendet e tyre, tani ish-Kryetari i Kuvendit, Kadri Veseli, pasi mbërriti në sallë i buzëqeshur, ka pasur një urim për legjislaturën e ardhshme, raporton KTV.

Paraprakisht, në rend dite ka qenë votimi i marrëveshjes për fondet “IPA 2018”, për çka ishin dakorduar shefat e grupeve parlamentare në mbledhjen e fundit të kryesisë.

103 vota për kanë bërë që projektligji i njëjtë, të kalojë, për t’i hapur rrugën diskutimit për pikën tjetër, shpërndarjes së Kuvendit.

Avdullah Hoti, tanimë ish-Shef i Grupit Parlamentar të LDK-së, ka bërë një përmbledhje të gati 2 vjet qeverisjeje të Ramush Haradinajt, që të enjten nuk u ul në karrigen e kryeministrit në Kuvend.

Një sërë skandalesh, afera e keqpërdorime ka numëruar Hoti në 10 minutat e tij.

Përveç shefave të grupeve parlamentare, pati edhe deputetë që ishin paraqitur për të marrë fjalën, përkundër insistimit të Veselit që të shkohet me votim.

Derisa shumë deputetë flisnin njëkohësisht, disa të tjerë vëmendjen e kërkonin në mënyra të tjera.

Përmes mocionit,Veseli i hapi rrugë votimit për shpërndarje, ku 89 deputetë votuan për, 1 ishte kundër dhe dy abstenuan.

Dita e fundit e deputetëve pjesë të legjislaturës VI të Kuvendit të Kosovës, për shumëkënd më e dobëta në historinë e re të Kosovës, u kthye në një kujtim përmes fotografive që u shkrepën nga deputetët.

© KOHA. Të gjitha të drejtat janë të rezervuara.

Të ngjashme