Greva në ANP anuloi 3 fluturime, MPB-ja po heton punëtorët për shkelje ligjore

Tollovi e madhe është krijuar gjatë së mërkurës në aeroportin “Adem Jashari”, si pasojë e grevës së punëtorëve të këtij institucioni.

80% e punëtorëve morën pjesë në grevë, ku shprehën gjithsej 5 kërkesa. Ata paralajmëruan që në rast se nuk realizohen ato, drejtuesit e Sindikatës do të vazhdojnë me greva, raporton KTV.

Përderisa gjatë ditës janë anuluar 3 fluturime dhe dy të tjera janë shtyrë, të tjerat janë realizuar sipas orarit.

Paradite ka ardhur edhe një autobus nga Shkupi me udhëtarë që kanë pasur destinacion ndaljeje Prishtinën, por që është dashur të zbresin në Maqedoninë Veriore.

Zëdhënësja e ANP-së, Valentina Gara ka thënë se anulimet e fluturimeve janë bërë mbrëmë pasi që kompanitë janë njoftuar për grevën.

Ajo ka pranuar që gjatë ditës së martë ka pasur disa lëshime në sistemin e aeroportit.

Për mosfunksionimin e aeroportit për rreth një orë, Gara ka thënë se e rëndësishme është që ka pasur funksionim normal e jo sa sportele kanë punuar.

Ministria e Punëve të Brendshme ka njoftuar se ka dërguar në ANP inspektorë për siguri të aviacionit civil, për ta përcjellë situatën e krijuar.

Sipas njoftimit, dyshohet se personeli i ANP-së ka bërë disa shkelje ligjore gjatë grevës së një dite më parë.

“Inspektorët, për siguri të aviacionit civil të MPB-së, janë duke e hetuar rastin në fjalë dhe pas përfundimit të hetimit do të hartojnë raport zyrtar”, thuhet në njoftimin e kësaj Ministrie.