Video

“Pakti” 200 mijë eurosh i Byrosë Kosovare të Sigurimit me vëllanë e presidentit Thaçi

Vëllai i presidentit, Hashim Thaçi, Gani Thaçi, do të pensionet tre vjet më herët, derisa Byroja Kosovare për Sigurime do t’ia paguajë pagat e plota për këtë periudhë.

Ky është pakti, që ka ardhur pas incidentit, i cili kishte ndodhur 9 muaj më parë kur Gani Thaçi e kishte sulmuar drejtorin e Byrosë Kosovare për Sigurime, Blerim Pushkollin, raporton KTV.

Sipas burimeve të “Kohës Ditore”, vëllai i presidentit gjithashtu do ta marrë një shumë prej 200 mijë eurosh në emër të shkrirjes së pozitës së Koordinatorit, të cilën e ka mbajtur për disa vjet.

Konflikti, i cili dyshohet se pati përfunduar me grushte atëherë, kishte lindur për shkak se Gani Thaçi pretendonte se Pushkolli ia shoi pozitën: koordinator i përgjithshëm për planifikime strategjike, brenda Byrosë Kosovare të Sigurimeve.

Nga tri burime të ndryshme, gazeta ka mësuar se Pushkolli me anëtarët e Asamblesë së Përgjithshme të Byrosë Kosovare të Sigurimit para rreth një muaji e kanë votuar vendimin përmes të cilit, ia kanë shkrirë pozitën që e mbante Thaçi.

Ka rreth tri javë që gazeta ka tentuar të flasë me Byronë Kosovare të Sigurimeve rreth këtij vendimi, por drejtori i saj, Blerim Pushkolli, nuk iu është përgjigjur telefonatave dhe këtë nuk e ka bërë as institucioni që ai drejton.

Pushkolli është njoftuar lidhur me interesimin e gazetës përmes mesazhit telefonik, por sërish i njëjti nuk është përgjigjur.

Në tetorin e vitit të kaluar, vëllai i presidentit Thaçi kishte sulmuar fizikisht në Byronë e Sigurimeve dy persona , drejtorin Blerim Pushkollin dhe drejtorin e kompanisë së Sigurimeve “Ilira”, Gianni Sokoliq.