Kryeministri Ramush Haradinaj nuk e cilëson sekret takimin e vartësve të tij, Avni Arifi dhe Selim Selimi, javën e kaluar, me zyrtarë të Serbisë në Berlin.
Duke iu përgjigjur akuzave të presidentit Hashim Thaçi se ky takim ishte i fshehtë, Haradinaj ka theksuar se ata u ftuan nga zyra e kancelares gjermane, Angela Merkel.
Për këtë takim, ka shtuar se i ka njoftuar edhe partnerët e koalicionit qeverisës.
Tentimin për të paraqitur katastrofë humanitare në veri të vendit, Haradinaj e ka quajtur skenar të përgatitur nga Serbia, raporton KTV.
Ka thënë se kanë prova që persona të caktuar janë duke i fshehur produktet ushqimore nëpër shtëpi.
Madje, kryeministri ka përmendur edhe Stevo Paviçeviqin si udhëheqës i organizatës “Mbrojtja Civile” për këtë organizim.
Në këtë mbledhje të qeverisë, kabineti qeveritar ka tërhequr nga Kuvendi projektligjin për financimin e subjekteve politike.
Me propozim të Zyrës së Kryeministrit, qeveria ka larguar Naim Gashin si anëtar i Bordit të Ndërmarrjes “Ibër Lepenci”, duke e zëvendësuar me Liridon Zogianin.
© KOHA. Të gjitha të drejtat janë të rezervuara.
