Eskalon në akuza ndaj zyrtarëve të PDK-së ceremonia e nderimit për Masakrës së Dubravës

22 May 2019 19:19

Në ambientet ku kishte ndodhur masakra e Dubravës, këtë të mërkurë ishte paraparë të shënohej 20-vjetori i kësaj ngjarjeje të rëndë.

Por, ky organizim nuk shkoi ashtu siç ishte parashikuar.

Situata ka esklauar kur njëri nga të mbijetuarit e kësaj masakre, Shefqet Kabashi, doli para të pranishmëve dhe akuzoi dy zyrtarë të PDK-së, Hajredin Kuçin dhe Nait Hasanin, të cilët, sipas tij, e kishin quajtur atë tradhtar, raporton KTV.

Kabashin, me forcë tentoi ta largojë edhe vetë drejtori i Burgjeve, Nehat Thaçi.

E, më pas, nga këtu, Kabashi është larguar me forcë nga pjesëtarët e policisë.

Ndërsa, Policia e Kosovës, përmes një njoftimi, ka thënë se ka ndaluar Kabashin për 48 orë dhe në veturën e tij ka gjetur një pistoletë pa leje, të cilën e ka konfiskuar.

4 personat e tjerë të ndaluar së bashku me Kabashin, sipas policisë, janë liruar në procedurë të rregullt.

Pas këtij incidenti, në këtë shënim u kërkua drejtësi për këtë masakër. Ndërsa, kreu i Kuvendit të Kosovës, edhe këtu përmendi tribunalin për krimet serbe.

Këtu u tha se përkundër fakteve dhe dëshmive për këtë masakër, drejtësia ka heshtur karshi këtij krimi.

Masakra në burgun e Dubravës kishte ndodhur mes datave 19 dhe 22 maj të ‘99-s, ku të vrarë mbetën 160 të burgosur shqiptarë, kurse të plagosur mbi 300 ish të burgosur.

Ndërsa Shefqet Kabashi ishte dëshmitari kryesor në procesin gjyqësor kundër kryeministrit Ramush Haradinaj, i cili nga Gjykata e Hagës ishte dënuar me dy muaj heqje lirie për “refuzim të qëllimshëm për t’iu përgjigjur pyetjeve të prokurorëve”.

Kabashi kishte refuzuar të dëshmonte kundër Haradinajt në procesin e kaluar gjyqësor, kur kryeministri i Kosovës u shpall i pafajshëm.

© KOHA. Të gjitha të drejtat janë të rezervuara.

Të ngjashme