Kuvendin e injoroi Haradinaj, por jo edhe vëllai i tij

Lideri i Vetëvendosjes, Albin Kurti, veprimet e kryeministrit i cili po shkarkon ministra serbë, po i sheh vetëm si veprime për ta humbur vëmendjen kur Qeveria po kalon në krizë.

Por, vëllai i kryeministrit Ramush Haradinaj, Daut Haradinaj, thotë se sot, ministrat serbë po shkarkohen vetëm me një mesazh, e jo si në kohën e Isa Mustafës, kur është dashur që me protesta të shkarkohej Jabllanoviqi, raporton KTV.

Këto deklarime u bënë në Kuvendin e Kosovës, aty ku deputetët iu kthyen seancave të rregullta plenare, megjithëse nisja ishte me numër të vogël deputetësh në sallë.

Deputeti Haradinaj pati përgjigje edhe për deputetët opozitarë, të cilët kritikuan qeverinë për milionat që po i jep për autostradën e Dukagjinit.

Taksa ndaj produkteve serbe nuk kaloi pa u përmendur edhe në këtë seancë.

Ndërkohë, krijimi i një komisioni të përkohshëm për përmirësimin e procesit zgjedhor, ka përplasur grupet parlamentare në Kuvend.

Ata, më herët, ishin dakorduar që pjesë e këtij grupi të ishin të gjithë shefat e grupeve parlamentare, ndërsa tri partitë më të mëdha në Kuvend, ta kenë edhe nga një përfaqësuese grua, por LDK-ja propozoi një emër deputeti.

Ndërkohë, deputetët ia kanë vazhduar mandatin Komisionit Hetimor për PTK-në, meqë gabimisht ishin mandatuar veç për një muaj.