Kurti do zgjedhje për rrëzimin e Haradinajt dhe Thaçit

“Presidentin dhe kryeministrin i ndan taksa, por i bashkon korrupsioni”, ka thënë kryetari i Lëvizjes Vetëvendosje, Albin Kurti.

Për këtë, ai ka kërkuar mobilizim popullor, në mënyrë që vendi të shkojë në zgjedhje të reja.

Kurti ka treguar se ka filluar takimet me qytetarë në gjitha qytetet e Kosovës, raporton KTV.

Kurti, në një konferencë për media, ka thënë se taksa duhet të mbetet, sidomos pas kushtëzimit të presidentit të Serbisë.

Lideri i VV-së ka renditur të gjitha vendimet e qeverisë që, sipas tij, janë të dëmshme, duke e akuzuar atë për mashtrim.

Aty ka përmendur kërcënimet që qeveria thotë se ia ka bërë prokurorit Elez Blakaj, pazaret me Milan Radojçiqin, mashtrimet me demarkacionin, e të tjera me radhë.

Për bashkimin e Preshevës, Medvegjës dhe Bujanovcit me Kosovën, Kurti përsëriti se kjo nuk bëhet me anë të konferencave për shtyp, siç po bën presidenti Thaçi, por me ndihma konkrete.