Dy vrasje në Suharekë, polici vret në kazino një 30 vjeçar e vëllai vret vëllanë për pronë

Është vrarë J.A. 30-vjeçar, nga fshati Mushtisht i Suharekës, nga Sh.S polic i Kosovës.

Vrasja ka ndodhur paraditen e së dielës, në një kazino që gjendet rrugës për në fshatin Reshtan të Suharekës.

Policia ende nuk ka ardhur në përfundim nëse polici ka përdorur armën zyrtare kur vrau 30-vjeçarin, raporton KTV.

Por, ai është arrestuar pasdite nga hetuesit e Inspektoratit Policor dhe ndaj tij është caktuar masa e ndalimit prej 48 orësh.

Dëshmitarët, banorë të kësaj ane, kanë thënë se nuk kanë parë asgjë të dyshimtë në momentin kur ka ndodhur ngjarja tragjike.

Sipas tyre, viktima J.A. ka qenë punëtor në kazino dhe nuk është njohur se ka pasur konflikt me dikë.

Vrasja tjetër brenda 24 orëve në Komunën e Suharekës, ka ndodhur në Studenqan.

Për çështje pronësore, B.G 63-vjeçar e ka vrarë vëllanë e tij I.G 55 vjeçar.

Policia e ka arrestuar të dyshuarin dhe i është caktuar masa e ndalimit policor.

Në këtë rast, ka mbetur e plagosur edhe një grua e cila është jashtë rrezikut për jetë.