10 të akuzuarit për “veteranët e rrejshëm” deklarohen të pafajshëm

14 March 2019 19:37

Të pafajshëm janë deklaruar ish-anëtarët e Komisionit Verifikues të Statusit të Veteranit të UÇK-së, në shqyrtimin fillestar ku ata po akuzohen për keqpërdorim të detyrës zyrtare.

Por, në këtë seancë nuk janë paraqitur dy të pandehurit, Ahmet Daku dhe Xhavit Jashari, çka ka bërë që gjykata ta veçojë procedurën ndaj tyre, raporton KTV.

Kjo u kundërshtua nga Prokuroria.

10 të akuzuarve në këtë rast u është lexuar aktakuza.

E, kur i erdhi radha shtojcës së aktakuzës, e cila përmban emrat e përfituesve të statusit të veteranit, gjyqtarja vendosi t’i përjashtojë mediat dhe publikun.

Të gjithë të akuzuarit e kanë kundërshtuar aktakuzën.

Në këtë seancë, Prokuroria i ka propozuar gjykatës masën e përkohshme të ndalimit të pagesave të 19 mijë e 500 përfituesve të statusit të veteranit.

Por, ky propozim i prokurorisë u quajt i kundërligjshëm nga mbrojtja e të pandehurve.

Gjykata pritet të marrë vendim lidhur me këto pagesa gjatë ditëve në vazhdim.

Në shtator të vitit të kaluar, Prokuroria Speciale e Kosovës ngriti aktakuzë kundër anëtarëve të Komisionit për Verifikim të Statusit të Veteranit, në mesin e tyre ndaj Agim Çekut, Nuredin Lushtakut, Shkumbin Demaliajt, Rrustem Berishës e tetë personave tjerë.

Ata akuzohen për keqpërdorim të detyrës zyrtare.

© KOHA. Të gjitha të drejtat janë të rezervuara.

Të ngjashme