Tërheqje një hap mbrapa, u kanë kërkuar protestuesit policisë, në protestën kundër dhunës ndaj të miturës në Drenas.

Policëve kjo iu kërkua si shenjë distancimi nga veprimi i kolegut të tyre polic, i cili

dyshohet se për gati dy vjet e ka keqtrajtuar seksualisht, shantazhuar e abuzuar, me viktimën, e cila atë kohë ishte 16-vjeçare.

Por, policia që mbante rendin të enjten në protestën në Prishtinë, nuk lëvizi nga vendi, e kjo bëri që protestuesit të hedhin vezë në drejtim të tyre.

Dyshimi për dhunimin e të miturës nga hetuesi policor V.V., i Stacionit në Drenas, ka ngritur në këmbë shumë qytetarë, të cilët protestuan para Stacionit Policor "Qendra" në kryeqytet.

Qytetarët e kanë dënuar rastin, me të cilin thonë se janë të shokuar, por edhe kërkuan dorëheqjen e Drejtorit të Përgjithshëm të Policisë, Reshat Qalaj.

Figura të ndryshme publike, por edhe deputetë të Kuvendit të Kosovës, morën pjesë në këtë protestë.

Protestë tjetër mbahet të premten, nga ora 12:00, në Drenas.