Video

Specialja interviston në cilësinë e të dyshuarit ish-komandantin e Përgjithshëm të UÇK-së

Zyrtari më i lartë që ka udhëhequr me UÇK-në, Sylejman Selimi, është i dyshuari i radhës i Prokurorisë së Specializuar.

Selimi, që në Kosovë është gjykuar dhe dënuar për krime lufte, sipas avokatëve të tij, është intervistuar shkurt në Prishtinë, raporton KTV.

Por, ata kanë thënë se shkaku i hetimeve nuk mund të japin detaje për dyshimet e Prokurorisë së Specializuar dhe Gjykatës Speciale, megjithëse, sipas tyre, nuk është bërë krejtësisht e qartë se për çfarë rasti janë të interesuar prokurorët e Speciales.

“Marrja në pyetje për z.Selimi është bërë nga Prokuroria e Specializuar, ne jemi paraqitur aty sot. Z.Selimi e ka dhënë deklaratën e tij që ka qenë e përshtatshme për pyetjet që janë shtruar dhe kjo çështje për momentin ka përfunduar krejtësisht në favor të tij”, ka thënë Greogry Guy Smith, Avokat i Sylejman Selimit.

Por, lirimi i Selimit nga ballafaqimi me organet e drejtësisë ka qenë i shkurtër, sepse ai deri para 12 ditësh ishte në burg si i dënuar për krime lufte.

Sylejman Selimi u dënua me 8 vjet burgim, por vetëm në janar u lirua nga Paneli për lirim kusht.

Pos tij, në Hagë muajin e kaluar u intervistuan edhe dy ish-komandantë tjerë të UÇK-së, ai për Zonën e Drenicës - Sami Lushtaku dhe Rrustem Mustafa, që ka udhëhequr UÇK-në në Zonën e Llapit.