Video

Mjekët thonë se i moshuari në Emergjencë ishte në gjendje të dehur

Këto janë pamjet e një të moshuari në Klinikën Emergjente në QKUK, që duket se tregojnë se askush nga stafi nuk merret me këtë të sëmurë.

Por, version tjetër nga kjo video ka dhënë drejtori i kësaj klinike, Basri Lenjani.

Ai ka mohuar që stafi i kësaj klinike të mos jetë kujdesur për këtë pacient, duke thënë se të gjithë pacientët marrin shërbime emergjente brenda 24 orëve.

Ndërkohë, Lenjani ka treguar edhe disa video ku shihet stafi i Klinikës Emergjente duke i ofruar ndihmë pacientit.

Lenjani ka shtuar se pacienti tani është liruar në shtëpi dhe mund të marrë trajtimin mjekësor dhe shërbimet në vendin ku ai banon.

Kirurgu i përgjithshëm në QKUK, Arbër Morina, ka folur për rastin që ndodhi në Emergjencë, ku një i moshuar i cili kishte shkuar për të kërkuar ndihmë mjekësore ka mbetur duke u përpëlitur në karriget e korridorit.

Sot SHSKUK-ja përmes një njoftimi për media ka treguar se atij i është ofruar ndihma, këtë e konfirmoi edhe Morina në Express Intervistën në KTV.

“Drejtoria e SHSKUK e ka demantuar rastin, qytetari që e ka bërë këtë video ka pasur tendencë negative të kësaj klinike. Pra personi që ka filmuar ishte qytetar i pandërgjegjshëm. Për këtë, ky lajm mori hov sepse populli ynë janë të privuar të ndjekin lajme të këqija. Videoja u pa vetëm nga një kënd. Pacienti në fjalë është i vetëm, nuk ka pasur familjarë. Kur u lajmërua në klinikën emergjente ai kishte probleme të vjetra me mushkëri dhe zemër. Ne e kemi kryer punën tonë në afat kohor. Aty ka pasur edhe pacientë të tjerë që janë dëshmitarë. I kemi ofruar ndihmë dhe ai mi puthi duart. Pacienti ishte në gjendje të dehur, ndoshta edhe i lodhur. Si i pastrehë, është ulur aty për t’i pritur familjarët. Personi që xhiroi atë moment kishte tendenca negative ndaj nesh”, sqaroi Morina.