Video

LDK-ja e quan ekipin negociator “grup dekori”

Arenë fyerjesh nga LDK- ja është cilësuar Kuvendi i Kosovës, si dhe Ekipi negociator është quajtur dekor.

Sipas tyre, dialogu me Serbinë ka hyrë në një rrugë pa krye si shkak i keq-qeverisjes, raporton KTV.

Kryetari i LDK- së, Isa Mustafa, ka thënë se kjo qeveri nuk është dhe nuk do të jetë legjitime dhe se kjo qeveri duhet të rikonfigurohet.

Ai e ka përkrahur taksën prej 100%, duke thënë se Serbia e ka merituar një masë të tillë.

Mustafa ka thënë se kryeministri Ramush Haradinaj tani e ka më të lehtë të marrë veprime pasi që ka numër më të madh të kabinetit qeveritar, duke u përfshirë nga 35 këshilltarë dhe 80 zëvendësministra.

Shefi i Grupit Parlamentar të LDK- së, Avdullah Hoti, ka numëruar disa nga dështimet e kësaj Qeverie.

Hoti ka kritikuar edhe buxhetin duke e quajtur si buxhet të dobët e të hartuar për interesa private të PAN- it dhe PSD- së.

Kryetari i Lidhjes Demokratike të Kosovës, Isa Mustafa, i është kundërpërgjigjur kryetarit të Kuvendit të Kosovës, Kadri Veselit, i cili tha që LDK-ja mos t’i fërkojë duart se nuk do t’i gjejë asgjë prej Gjykatës Speciale. Mustafa ka thënë se nëse dikush ka bërë krime në Kosovë, atëherë ai duhet t’i fërkojë duart e veta.

Ndryshe, LDK- ja, kur ishte pjesë e Qeverisë ka votuar pro Gjykatës Speciale.