Në cilësinë e dëshmitarit Thaçi kërkoi dënimin maksimal për “Syrin e Popullit”, involvon Kurtin e Konjufcën

28 December 2018 19:05

Presidenti i vendit, Hashim Thaçi ka dhënë dëshminë e tij në rastin “Syri i Popullit.

Para se të hynte në sallë presidenti, kryetarja e trupit gjykues, Naime Jashanica, ka kërkuar që të mos xhirohet dëshmia e presidentit.

Presidenti e ka cilësuar ndërmarrje vrasëse organizatën “Syri i Popullit”, gjatë dëshmisë së tij në Gjykatë, në të cilën nuk u është lejuar mediave të xhirojnë.

Sipas tij, kjo organizatë udhëhiqet nga Sadri Ramabaja, Glauk Konjufca dhe Albin Kurti.

"E kam dëgjuar me veshët e mi njëherë Glaukun e pastaj Albinin se këta persona duhet me i vra se ndryshe nuk i heqim nga pushteti, andaj këtu e bazoj dëshminë time dhe kërkoj nga Gjykata që këtyre personave t’u jepet dënimi maksimal”, ka thënë Thaçi.

I pari i vendit ka kërkuar që seanca të jetë e mbyllur për publikun, në mënyrë që, siç ka thënë ai, të kishte mundësi t’i bënte publike edhe emrat e tjerë që bëjnë pjesë në këtë organizatë.

“Unë nuk mund t’i bëjë publike sekretet shtetërore, po të ishte seanca e mbyllur, dëshmia ime do të ishte ende më rënduese për të akuzuarit”, ka thënë Thaçi.

Gjatë ditës dëshminë e tyre e kanë dhënë edhe kryetari i Kuvendit, Kadri Veseli, nënkryetari i Kuvendit, Xhavit Haliti, ish-ministri i Drejtësisë, Hajredin Kuçi, deputeti i PSD-së, Faton Topalli, ishte i ftuar edhe Berat Buzhala, mirëpo nuk ka qenë i pranishëm.

Kryetari i PDK-së, Kadri Veseli, ka kërkuar përgjegjësi nga anëtarët e “Syrit të Popullit”.

Ai ka thënë se kur persona të tillë lihen të lirë, ka viktima.

"Kur të tillët lihen të lirë, ndodhin raste siç ka ndodhur dje", ka thënë Veseli. Ai ka shtuar se ligji duhet të jetë i pamëshirshëm për këta persona.

I akuzuari Murat Jashari, ka thënë se e njeh Veselin që prej kohës kur funksiononte SHIK-u.

"Më 17 janar të vitit 2000, kam qenë në zyrën tënde në SHIK, në telefon ishe kur më pe. Në ato momente ke thënë që i kemi ndalur 20 maune me naftë", ka thënë Murat Jashari.

Veseli i është kundërpërgjigjur me nervozë Jasharit, duke i thënë se do t’i kërkojë doganës që ta gjejë listën e maunave që kanë hyrë me naftë në Kosovë, më 17 janar të vitit 2000.

“Marre të qoftë. Ke shkuar me rumune, për ta vrarë bashkëluftëtarin e vëllait tënd. Trego pse më ke futur në listë”?

Ndërsa, Hajredin Kuçi ka thënë se Ramabajën e njeh, sepse e ka pasur student të nivelit master.

Deputeti Faton Topalli ka deklaruar se është i habitur pse është ftuar si dëshmitar, ngase për këtë organizatë ka dëgjuar vetëm nga Kadri Veseli.

E shumë falënderuese u shpreh gjyqtarja e rastit, Naime Jashanica, që i ka rënë fati ta ketë përballë presidentin Thaçi.

Në fund, avokatët e të akuzuarve kanë kërkuar që t’i lirojnë klientët e tyre nga paraburgimi, kërkesë e cila nuk është aprovuar.

Seanca e radhës do të mbahet më 25 janar.

© KOHA. Të gjitha të drejtat janë të rezervuara.

Të ngjashme