Duke shpalosur histori dhe trashëgimi familjare përmes publicistikës, i koncentruar kryesisht në aromat nga ajo e gështenjave deri tek aroma e barutit, Veton Surroi ka përshkruar cikle jetësore jo vetëm individuale, por të jetuara nga gjithë shoqëria kosovare.
Këtë vit, laureat i çmimit “Rexhai Surroi” për letërsi është përzgjedhur romani “Gosti në natën e parë të vjeshtës”, i shkrimtarit Gëzim Aliu.
“Ky roman do t’i rezistojë kohës dhe do të mbetet në arkën e pasurisë sonë kulturore”, ka thënë anëtari i jurisë Kim Mehmeti, gjatë ndarjes së çmimeve.
Ndërsa autori i romanit fitues, tha se ndihet shumë i gëzuar për këtë çmim edhe pse jeton në një vend ku gëzimet zgjasin shumë pak.
Artikulli “Të marrësh udhën e gjatë drejt drejtësisë”, i publikuar në revistën K 2.0 e gazetares Dafina Halili, ka fituar çmimin “Rexhai Surroi” për gazetari të shkruar për vitin 2018.
Mirënjohja për vepër jetësore i është dhënë profesorit, Masar Shporta, për kontributin e madh që ka dhënë në fushën e arsimit në Kosovë.
Në njëmbëdhjetë-vjetorin e ndarjes së çmimeve “Rexhai Surroi” është përuruar libri “Tregoji Botës” i autorit kanadez Eliot Behar.
Libri sjell detaje për masakrat e tmerrshme në Kosovë të kryera nga pushteti serb të cilat i ka përjetuar edhe e mbijetuara Saranda Bogujevci.
Është viti i njëmbëdhjetë që “Grupi Koha” ndan çmimet “Rexhai Surroi” për gazetari të shkruar dhe letërsi, ceremoni kjo që organizohet në kujtim të jetës dhe veprës së gazetarit, shkrimtarit dhe diplomatit, Rexhai Surroi.
© KOHA. Të gjitha të drejtat janë të rezervuara.
